部分反對派想「造王」保送曾俊華入閘，但社福界唔少選委都對過往薯片唔肯用錢感到不滿，對佢支持「8．31」框架同要為香港基本法第廿三條立法更加係嬲到震。民主黨早前已聲言支持薯片，該黨乳鴿兼社福界選委羅健熙前晚開始就喺facebook連環發帖質疑社福界同工，社福界中人反擊他是否「乜都唔理，只要曾俊華」？鍵盤戰你來我往，跌到一地花生殼。
羅健熙前晚先喺fb發帖，寫到選委要向市民負責，質疑選委係咪「不需要向最新選民的取態負責？」撐薯片撐到出晒面之餘，噚晚又再發出寸嘴提問：「選委選舉時，現在的社福界選委當時的政綱如果是『不要梁振英，也不要曾俊華』的話，我地（哋）會當選定落選？」然後又自行留言加多腳話︰「要我估，我估如果民福咁樣寫既（嘅）話會輸到仆直。」
俾人指責唔顧民意，社福界選委當然嬲，立即發動鍵盤戰討伐羅健熙。「Andrew Wong」就狠批羅健熙「示範無知和無恥的偷換概念」，強調選委唔收曾俊華貨，「係畀咗一個月時間佢講政綱之後嘅結論。」
「Philip Tsang」則回應羅健熙道︰「咁你哋當初更應該寫︰乜都唔理，只要曾俊華。」羅健熙亦不甘示弱，「其實都係的，如果可以歷史重來，搵堆人寫『不要梁振英，不要曾俊華』，另一堆就寫『支持曾俊華踢走梁振英』，咁就應該容易判斷好多。」
「貧富更懸殊」「唔放水」
你以為咁樣羅健熙就反勝？高手真係在民間。「Janet Lui」強力抽擊道︰「係囉，寫埋『民主黨就算曾俊華推23條、撐831、唔評論UGL、×都唔× all in（全部票投）撐曾俊華』咪容易判斷好多囉。」羅健熙呢個時候就當然扮盲啦。
另外，亦都有唔少人繼續數薯片罪行。「Kin Kan Yu」就話︰「前財爺曾俊華在任期間，貧富懸殊加劇，他沒有正視。試問社福界選委憑什麼可以支持曾先生！」「Joseph ML Wu」︰「曾俊華當年死都唔放水，重衰過摩西。」 ■記者 甘瑜