曾俊華一直被形容為「形象親民」，早前又多次落區飲吓食吓「體察民情」，但到被邀請落場實戰、了解基層需要就覆都唔覆人。反對派社福界選委、沙田區區議員麥潤培前日邀請3個特首候選人落區到馬鞍山屋邨，用100蚊買齊三餸一湯上樓探獨居長者，更三度去信曾俊華都未獲回覆，質疑對方究竟係「真．親民」定係做騷。
曾俊華大賣所謂「曾.connect」來塑造形象。昨晨，他到天水圍乘輕鐵、行商場與時裝店店主交談，並入茶餐廳吃午餐，又在fb展示一封「市民」的來信及其肖像漫畫，又作出長篇回覆，包括大學院校自主、樓價及環境保護等方面，力銷其政綱。
區議員邀探長者無回覆
落區親民當然係好事，但曾俊華似乎有啲選擇性「connect」喎。麥潤培前日邀請3名候選人落馬鞍山屋邨，但只係請到胡國興落區。佢話林鄭月娥透過競選辦回覆指事忙未能出席，而「我哋send咗3封信畀曾俊華，係沒有回覆嘅」，批評曾俊華信都唔回，令人質疑究竟係「真．親民」定係做騷。唔通只有名DJ先可以同曾俊華connect到，基層市民、獨居長者就費事同佢哋connect？
佢表明投票取向會跟所屬嘅社總，又認為雖然「民主300+」早前決定跟隨「特首民投」結果綑綁投票，但因為係投暗票，所以所謂「綑綁」只有參考性。
本來候選人去唔去，的確係要夾時間嘅，時間唔啱唔去都無可厚非，但連覆都唔覆人，搞到自己力銷嘅「曾.connect」變「失.connect」，咁就唔係幾好啦！ ■記者 陳庭佳
