■杜汶澤收返佢畀神駒同馮敬恩合照嘅like，不過早就被cap圖。 fb圖片書展就曲終人散喇，但係「熱青城」（「熱血公民」、「青山城邦派」）同「本民青」（「本土民主前線」、「青年新政」）、「港大幫」仲有「狗主」黃毓民喺入面嘅恩怨情仇，就繼續喺網上發酵。其中俾「熱狗」定性為親「本民青」等「獨派」嘅藝人杜汶澤（阿澤），日前喺facebook like（讚好）咗「無敵神駒」仇思達同入冊在即嘅港大前學生會會長馮敬恩合照，仲有神駒同其他「獨人」嘅post（帖文），即刻就俾「熱狗」係咁噬。唔知係咪驚俾人覺得佢支持「港獨」，下場仲慘過返廣西捱騾仔，阿澤之後收返晒啲like，仲出post戴頭盔話討厭政治，不過畀出去嘅like等如潑出去嘅水，阿澤呢次核突咗少少喎！
話說喺今年書展有份出書嘅神駒，連日喺書展集郵再放上fb做閃卡，以示自己幾咁受支持，其中一張就係同馮敬恩嘅合照，而阿澤當初有份like張合照，就俾親「熱狗」嘅fb專頁「廢除雙重國籍行動」捉到，仲叫各「熱狗」留意佢嘅動向。專頁寸阿澤插「熱狗」可以紓緩同「藍絲」嘅關係，又可以爭取「本民青」支持，食晒兩家茶禮，「冇成本玩嘢點解唔做」，叫「熱狗」將佢對「獨派」啲like同留言cap圖（截圖）再去「藍絲」啲專頁度廣傳。
唔少「熱狗」都有同感，其中「Eli Winterson」話阿澤呢排活躍咗，成日向「獨派」畀like，親傻根（陳云根）嘅網上三國人物「劉禪」亦都提到，阿澤有份喺神駒直播唱惡搞版聖詩時畀like同留言。俾傻根「逐出師門」嘅「無待堂堂主」盧斯達，就cap咗阿澤like佢鬧「熱狗」文章嘅圖，慨嘆「阿澤被擊殺」。
阿澤之後笠水收返晒啲like，「廢除雙重國籍行動」寸佢「無×用 」，「其實為咗班垂死嘅『講獨』仆×冚×剷，攞你視后老婆嘅事業出嚟較飛係咪值得？」而阿澤噚日就煞有介事喺fb分享咗成一年前嘅前立法會主席曾鈺成訪問，大大隻字話「我討厭政治」，但就摘錄咗曾鈺成讚狗主嘅內容，真係唔知佢開邊瓣！ ■香港文匯報記者 陳庭佳