■竟然籌到二百幾萬，梗係唔分畀人啦！ fb截圖反對派組織日前為聲援「雙學三丑」被判監而發起遊行，為催谷更多人參加同科水，結果大會將所有因為暴力示威而被判囚者，和「三丑」等百幾人都統稱為「政治犯」，搞「大團結」。結果，「本土民主前線」及各大學的「獨莊」當日都有現身，成個活動仲籌到二百五十幾萬元。不過，所謂「財到光棍手」，遊行時話有百幾個「政治犯」，完事後突然又得返16個，所有籌返嚟啲錢都會用嚟支援呢16個人，結果引起當日遊行者不滿，狠批「泛民」搞遊行時就話「不分黨派」，籌到錢時就「分黨分派」，係當「獨派」係用完即棄嘅避孕套喎！
吹雞支援百幾人 收水即反面
日前嘅遊行本來就係聲援「雙學三丑」、「東北案13人」，「東北支援組」、社民連、「香港眾志」、「大專政關」為咗搞呢次活動嘅組織，都叫做「十六在囚抗爭者支援小組」。不過，可能此前相關活動嘅反應都係麻麻哋，為咗催谷參與人數，佢哋在宣傳時猛話反對派，包括「獨派」都要「大團結」，仲不斷宣傳包括在旺角暴亂期間掟磚、縱火、襲警嘅人都係「政治犯」，整咗張百幾人嘅名單出來，由於「獨派」支持者買少見少，難得「泛民」幫佢哋搭個大舞台，當然落疊參與。
不過，遊行結束，錢都籌埋，「獨派」就冇晒利用價值。社民連近日代大會公佈在是次遊行籌得嘅款項時就話：「感謝大家參與昨天（大前日）遊行，以及感謝大家捐款支援16人，包括東北13人及雙學三子公廣案。我哋昨日（大前日）籌得港幣2,515,690（元），並將用於支援囚友、其親友及案件上訴費用。」
講錢失感情 反對派互插
反對派當所有參加者都係支援「16人」都係小事，最大件事係籌成200萬元，結果佢哋遊行期間頂喺頭頂嗰「百人名單」就突然唔見咗，剩返16個人。此舉當然引起反對派內不同派系支持者嘅不滿，仲引發罵戰互插（見表）。
所謂講錢就失感情。係嘅，口號係廉價嘅，講幾句話「獨派」暴力示威者係「政治犯」有咩成本啫，但現兜兜二百幾個（萬）喎，唔通真係同你分身家呀！ ■香港文匯報記者 羅旦