■兩隻乳鴿發酸文說民記被「關照」，似乎唔記得咗老鴿黃碧雲單嘢囉。 fb截圖有啲政界中人，一搶唔到鏡頭就葡萄。話說青嶼幹線前日大塞車，身為「受害人」嘅民建聯新界西立法會議員陳恒鑌，同運輸及房屋局局長陳帆到現場視察，民主黨副主席羅健熙就「睇唔過眼」，話陳帆局長對民建聯「情有獨鍾」喎！有網民即時秒殺，話陳局長都曾經陪過佢同黨「一嚿雲」（黃碧雲）見過記者喎，睇嚟都係俾葡萄遮住咗對眼。
懶理陳帆曾與「一嚿雲」見記者
真心為市民服務，點會計較有冇鏡頭？但好多反對派中人就「沒有鏡頭，哪有蒲頭」。在青嶼幹線塞車時，反對派都係做「鍵盤戰士」，又話關心又話盛，但陳恒鑌自己當時就塞喺車龍度，其後親身落去睇，仲請埋陳帆局長跟進情況。民主黨中人自己冇做，就喺fb發帖葡萄人哋。
羅健熙在fb帖文中稱，「陳帆局長對民建聯真係情有獨鍾，有咩嘢都第一時間搵埋佢地（哋）相伴，上任短短個零月，已最少有三四次類似的incidents（意外）。但叫佢同立法會議員一齊睇高鐵總站，又唔見佢去......」
可能覺得俾陳局長「睇小」，於是佢乘機想嚇對方，意思大概係你唔畀面我你就因住：「今（前）朝單嘢你肯道歉未？黐住民建聯就唔駛（使）道歉呀？佢包庇你唔代表市民放過你喎。仲有一地兩檢福田站個預留地方去咗邊？」
相信係鴿黨議員助理嘅「Quentin Cheng」就更私怨上頭，留言道：「所以追殺運房局，完全唔會留手！」
民主黨南區區議會柴文瀚也轉發了羅的帖子，葡萄道：「新政府未夠60日，不如都做過（個）小回顧，睇睇陳帆對民建聯『關照』：8月4日--路過見到19座新小巴坐一陣--劉國勳；8月14日--參觀香港首輛低地台小巴--劉國勳、陳恆（恒）鑌；8月21日--視察青嶼幹線雙向收費問題--陳恆（恒）鑌、鄭泳舜。」
網民：恒鑌係交通事務委主席
不過，網民就唔係咁睇。「Yuuji Izumo」指出：「人地（哋）（陳恒鑌）係（立法會）交通事務委員會主席，形式上無得唔叫佢地（哋）到。」
「雷子健」更秒殺道：「陳帆做機電署長時，即係幾個月前的朗豪坊電梯事故，同黃碧雲一齊喺民主黨立法會office見記者㗎喎！」■香港文匯報記者 羅旦