■公民黨搞的廣明苑屋苑管理諮詢會。香港文匯報訊（記者 羅旦）有選舉就會有政黨爭風呷醋，邊個仲記得幫街坊做嘢？將軍澳廣明苑一批業主不滿業主立案法團撤換管理公司，仲搵咗「將軍澳民生關注組」召集人陳展浚，同「關注組」社區發展主任葉嘉榮幫手。事件搞到鬧哄哄，公民黨立法會議員楊岳橋將軍澳地區主任雷啟榮就疑似想爭埋一份，被指派人私下收集廣明居民電話。陳展浚就不點名批評對方「我搭好個台，你上嚟表演攞彩」喎。不過，有疑為雷打手者，就批評陳展浚等誤導居民，「恨選票恨到無所不用其極」，當居民係棋子喎，睇嚟大把花生食。
將軍澳廣明苑有逾4,200住戶。屋苑業主立案法團舉行特別業主大會，以57%票數通過撤換管理公司。有部分業主指當日只有70多戶出席，並擔心屋苑樓齡近20年，未來需做樓宇維修時會出現天價維修工程喎。除了陳展浚同葉嘉榮外，關注組主席柯耀林更號召業主出席昨晚舉行的所謂「特別業主大會」。
「關注組」先動 公民黨介入
所謂「瘦田冇人耕，耕開有人爭」，一直唔多關心呢件事嘅雷啟榮早兩日就落咗去搞「屋苑管理諮詢會」，又請埋楊岳橋同「火炭穗禾苑業主立案法團委員」等分享。佢一落去，是非就嚟嘞。
諮詢會講者之一、自稱火炭穗禾苑業主立案法團委員「Pauline Leung」，喺葉嘉榮fb質疑「關注組」搞所謂「特別業主大會」並無法律效力，可能誤導業主，結果被刪留言兼被block。
「Pauline Leung」大吐苦水道：「有一班人好怕我，將我的留言刪除，更甚者封鎖我進入關注組。......他們自覺個地盤係佢地（哋）搵番嚟嘅，其他人想幫忙係別有用心，他們才是真小人，希望廣明苑的街坊小心行事，務必跟著（着）建築物管理條例344處理屋苑一切事務。」
另一疑似知情者「Kok Man Chang」也發帖道：「各位廣明苑業主，千萬唔好上當，呢封（柯耀林發出的）業主大會通知係非法文件，你地（哋）要小心。按344建築物管理條例附表三第3段，法團會議只可以由法團主席召開及主持，業主並冇資格處理法團會務。提醒各位，小心個人資料被盜取，可到當區民政署和警署諮詢一下，今次係我參與反圍標反貪腐運動以來首見。」
被指私下收集廣明居民電話
陳展浚就懷疑係雷啟榮搵人「搞」佢哋。他在fb發帖稱：「我好想講：你口中呢十日發生好多事，呢十四日無一件事你有份參與過，係我哋班兄弟姊妹一手一腳做，我哋唔瞓唔食，去努力做，係有血有汗。......合作無問題，我從來都好樂意，正如千人居民大會我請你去台一樣。但你不但不領情，仲要係（喺）居民會場邊收街坊電話，而（𠵱）家仲要飛起我開個居民會教人點組隊選法團，想打劫我哋嘅成果。即係我搭好個台，你上嚟表演攞彩，你都得嫁（㗎）啦。」
葉嘉榮就喺fb話，有人「借大佬把口講成立『柯（耀林）雷（啟榮）聯盟』並組織新的關注組去跟進事件；......最後更直接收集廣明居民電話，喂你嗰頭講柯雷，又話今晚係合辦，依（𠵱）頭喺柯生唔知嘅情況私下收集電話。擺哂（晒）兩位大佬上枱喎。你全程拎住啲咪，唔比（畀）我哋講嘢，反圍標大聯盟的趙恩來仲在場竟然不獲發言乾企兩小時」等等。
雖然兩人冇開名，但講到「合作無問題」、「合辦」、「飛起我開個居民會」，點講都無理由話緊建制派啩？有疑為「雷派」中人就反擊陳葉。
「Tina Wong」直言：「D（啲）居民比（畀）佢搞死，到頭來，兜一大個圈，可能更糟糕。」
疑雷打手反指「恨選票」
「Liang Liang Chen」批評道：「恨選票恨到無所不用其極。」 「Tina Wong」回應說：「恨選票唔緊要，但唔好當居民棋子！」