有時做錯嘢，要道個歉真係好難咩？民主黨立法會議員鄺俊宇（鄺神），早前喺fb做咗激進「動保」分子何來嘅「幫兇」，屈元朗一間小食店賣狗肉，害到人雞毛鴨血，到真相大白佢就探對方又搭人膊頭影相放上網，非但死口唔道歉，仲話對方感謝佢幫手「協助查證（流言）真偽」喎，激到廣大網民話「有一種無恥叫鄺俊宇」。前日，佢終於鬼鬼祟祟喺fb發帖致歉，有網民就話佢唔鬧唔道歉，認為佢應該引咎辭職咁話。
以為無事 點知更多人鬧
話說喺10月底事發後，鄺俊宇一直都唔肯道歉，扮冇事繼續寫矯情文，以為網上嘅嘢好快就會消失，點知越來越多人鬧。搞咗半個月，鄺俊宇終於都喺fb發文道歉，話自己這次「確實處理得不理想」，而「為表歉意」，他於上周特意再探望該食店的老闆「幹哥」，親自向對方誠意致歉喎，並汲取教訓，冇再post相。
佢繼續話，當自己向對方賠不是時，對方反而安慰他，「恰巧當時客人比較多，於是幹哥『罰』我當了一陣子店員，替客人包裝外賣，忙完一輪，幹哥笑（道）：『嗱，罰咗你喇！』」然後就反省話身為立法會議員，「在收到求助後要積極跟進，但也應該小心謹慎......汲取了教訓，希望下次在跟進一些動物涉嫌被虐個案時，能加倍謹慎」云云。
食店：下次處理事情小心啲
該食店就截咗鄺俊宇fb帖文，話：「鄺俊宇先生，下次處理事情小心D（啲）喔！歡迎多多光顧。」
鄺俊宇嘅支持者，當然紛紛話自己「偶像」知錯能改呀、好有承擔呀咁，但其他村民就唔係咁諗。
「Mario Lee」道：「比（俾）人洗板××到祖先都要山墳爬出黎（嚟）先肯道歉，真心定為勢所逼（迫）唔洗（使）人講啦！」「Baba Li」更狠批道：「查都未查就講到真嘅一樣，害×到人哋雞毛鴨血，比（俾）人×到反艇先出嚟踏（搭）人膊頭扮friend番（返），講聲唔好意思就×就，你份人真係冇×得頂啦！」
「Odelia Tam」就直言：「如果有官員攪（搞）錯左（咗）一件事，之後同你一樣，私下道歉再po fb寫同一樣文字，鄺議員收貨嗎？」
「Nat Nat」揶揄道：「會要佢辭職道歉囉，但不嬲泛民就係龍門任佢擺。」「Kim Ho」就直截了當：「有無考慮向公眾負責，引咎辭職？」
反對派最鍾意郁啲就叫人辭職，現在俾人還施彼身，真係老尷。鄺粉當然幫口啦。
「Carmen Leung」聲言：「高官衰左（咗）未駛（使）辭職啦！」
「Silver Lee」更道：「辭職等於逃避， 我希望見到肯改進既（嘅）人，唔係有事就推卸責任再逃避。」
「Nesta Maximilian Lai」即揶揄道：「你既（嘅）講法，姐（即）係佢同高官一樣啦，仲講乜...又一個企係（喺）道德高地就贏晒？！」
「Kim Ho」也道：「不如叫鄺神以身作則，為誣衊小市民而引咎辭職先，之後咪可以向高官施壓囉。」咁鄺粉又有咩高汁回應？
「Hysan Ng」就「示範」道：「D（啲）五毛點講都好，我永遠支持鄺俊宇。」 ■香港文匯報記者 羅旦