反對派嘅所謂「初選」，喺九龍西明明已經由蟲炎（姚松炎）大熱勝出，民協老馮（馮檢基）已經輸到政治生涯半隻腳叉咗入棺材，但班反對派都仲想幫佢打多口棺材釘，連「Plan B」都唔畀佢做。「人民力量」慢必（陳志全）噚日就諗咗條令人歎為觀止嘅橋，話如果蟲炎被DQ，老馮就「Plan B」出選，贏咗再辭職，去啟動另一次補選，其實即係「個位選完都唔會係你㗎」。咁你都諗得出，唔少激進派都同情老馮，鬧爆慢必戇居，連「熱狗（熱血公民）」前頭目狗達（黃洋達）都問︰「呢D（啲）係乜×野（嘢）plan？每個月補選一次好唔好？」
慢必噚日喺facebook自己同快必（譚得志）諗咗個「Plan B+」，話既可以畀老馮參選，亦都唔影響「民主派」團結喎，就係如果最後真係需要老馮「Plan B」出選，只要老馮願意，再次啟動另一次補選，等選民可以再揀過，就證明佢唔係「戀棧權位」，是「大局為重」，咁大家又會願意「含住先」去投票啦。
咁驚為天人嘅諗法都夠膽寫出嚟嚇大家，唔少網民都留言踩到盡。「Fai Hung Cheng」直接話佢︰「你真係，too simple， always naive（naive）。（太膚淺幼稚）」「Jackal Hui」︰「你都幾好笑，不斷辭職！你都辭啦不如，果然同快必係同一個組合，on on（戇戇）××住埋一台。」
狗達：不如每個月補選？
狗達都忍唔住cap圖出文話慢必︰「呢D（啲）係乜×野（嘢）plan？每個月補選一次好唔好？」班「熱狗」隨即跟住寸爆慢必。「Ray Wong」就話︰「推動政治界就業發展。」「Tommy Poon」揶揄︰「每人做幾個月，咪唔先（使）爭來爭去囉！團結！」「Kelvin Lau」亦恥笑道︰「不如輪3班制丫（吖）笨！」
由中大講師劉正管理嘅facebook專頁「無神論者的巴別塔」亦出文笑班反對派嘅「Goodest logic（恐怖邏輯）」。佢質疑，既然覺得「初選」遞補機制咁有問題，「點解果（嗰）陣唔力排眾議提出反對？......要搞到初選選完先輸打贏要？」
連日俾人踩到入棺材嘅老馮冇喺自己fb度出文回應，但就接受傳媒訪問，重申「Plan B」機制早就列咗喺備忘錄，各政團都白紙黑字認同。
前戰友寸食言 「死咗都唔恨」
「人力」前主席劉嘉鴻都「幫理不幫親」，出post話︰「如果連白紙黑字公開畫押嘅初選機制都打算推倒，咁真係sorry，呢啲『民主派』真係死咗都唔恨。」 ■香港文匯報記者 甘瑜