反對派為咗所謂「初選」搞咗場大龍鳳，點知個機制其實亂七八糟。本身係Plan B嘅民協老馮（馮檢基）宣佈退出唔玩之後，「自決派」朱凱廸就爆出，「民主派幾位代表」同姚松炎已經諗緊由邊個做Plan D，令各界譁然。民主動力嘅趙家賢昨日就試圖解畫，話咁多次會議入面無人探討過Plan D，咁即係朱凱廸講大話？他就即刻deadair，口窒窒咁話：「或者大家對字眼理解不同。」
趙家賢朱凱廸說法矛盾
趙家賢噚日分別上咗兩個電台節目，交代返「泛民初選」鬧劇的情況。佢話，由於姚松炎團隊對於「諒解備忘錄」的條文有不同意見，即係「可根據初選結果首兩名至三名參選人的支持度百分比排名的優先次序作為報名的 Plan B / Plan C」，所以就促成咗一次會議，矛頭直指姚松炎唔想跟機制喎。不過佢補充，會議後大家都共識跟返機制，由得票率最低的袁凱文做Plan C。
佢續指，會議入面有就不同的情況「沙盤推演」地探討，但就沒有討論Plan D的人選，甚至完全無提到 Plan B 及Plan C都唔玩之後的情況喎。喺趙家賢反覆重申「真係無傾Plan D」嘅同時，睇返朱凱廸個聲明，他就提到：「民主派幾位代表和姚松炎開會討論，大家得到的結論就是：支持遞補機制，同時物色一包底人選（Plan D），若姚松炎被DQ，而馮袁均不出選，則由Plan D補上。」兩人嘅講法好有出入喎，莫非有人講大話，想隱瞞一啲事實？
主持人就醒水追問，朱凱廸明明話同時物色Plan D㗎喎？佢首先回應：「佢點講法，我唔可以評論......」又話民主動力只可以執行機制，無能力搵Plan D。俾主持人問多兩問，佢就突然間deadair咗2秒，之後爆出一句「可能因為大家對討論時的字眼理解唔同」喎。有討論咪有討論囉，何必死撐想守護政治「倫理」啫。反正由老馮被威脅下退出開始，明眼人都睇到你哋點「操縱選舉」啦。■香港文匯報記者 范童