■為着每月10萬人工，小麗老千要揸頸就命乎？ 視頻截圖邊個想睇羅三七（羅冠聰）同小麗老千（劉小麗）俾人打到啪啪聲？相信好多人都會舉手。「香港眾志」港島區參選人周庭近日就上載咗條片，其中羅三七同小麗老千就「模擬」俾人兜巴星，嚟形容佢哋被DQ一事。呢條片上網後，引來唔少揶揄：有網民就話點解唔見咗俾「自決派」夾硬迫退DQ嘅「Plan B」馮檢基，有「港獨」分子更話條片故意唔提「青症雙邪」都係被DQ。有「眾志」支持者質問呢啲「港獨」做過咩，對方即刻反駁話周庭在「佔中」時做逃兵，「佢又做過啲咩？」
周庭「佔中」逃兵扮「女俠」
喺嗰條講DQ嘅片中，「瀆誓四丑」3人登場。羅三七、小麗老千就「借位」拍俾人兜巴星，後者仲要被揑頸，嘩咩咁重口味玩SM？但唔知係咪敬老，「長毛」梁國雄就淨係俾人㩒住膊頭烏低身，可能驚做佢對手嗰個真係忍唔住假戲真做打佢一鑊啩？
因為連白紙黑字協議都可以隨口推翻、仲連埋「自決派」議員朱凱廸發動支持者趕盡殺絕馮檢基搞到佢連「Plan B」都做唔成嘅姚松炎，片中就冇佢份，唔知係咪驚趕客？「青症雙邪」游蕙禎（Cheap禎）同梁頌恆（的士梁）叫做係咁意個名喺字幕度出現過幾秒，但就冇樣睇。陰功，相信好多人想睇到佢哋俾人摑甚至拳打腳踢，如果SM程度高過小麗老千，條片肯定更多人睇。
言歸正傳，條片係話幾條友被DQ係被「暴力對待」，係等於將投票俾佢哋嘅選民嘅票掃落垃圾桶。最正嘅係，條片最後就由周庭「打救」晒呢3條友。嘩，咁勁？周庭應該諗吓唔好「大材小用」、取代「青城派國師」傻根（陳云根）做「地球大總統」，拯救地球囉！
講完條片，就講反應。當然，好多「眾志」支持者都冇理會點解羅三七同長毛俾人SM都冇還手之力，反而一個當年喺「佔中」期間因為「我恐懼，我誤判」而就走咗去唔做「學民思潮」發言人，現在就會突然好似標咗童咁神勇，圍爐大讚。
當然，一講到DQ，點可以冇馮檢基份？「Bert S F Wong」揶揄道：「條片拍得好好，不過點解唔見馮檢基？」「Edison Ka Ho Yeung」也說：「咁迪迪（朱凱廸）DQ馮檢基，有冇人同佢申冤？」「Moon Cheung」則道：「人人都是馮檢基！」
「Franco Wong」留言道：「其他兩區民主派要有初選，而初選大部分候選人都係有選舉經驗，但點解港島區就咁放心比（畀）你去出選？另外就係你當年試過受不住壓力而退出前線，而（𠵱）家假若你成功當選，你會點樣處理壓力，又點樣承諾選民你唔會退縮？」
未撐梁游激怒「青症」粉
最火滾嘅都係「獨派」中人，特別係條片冇拍到Cheap禎俾人打（誤）。「Ka Fu」就留言話：「咁你係未（咪）要支持返青政班人呢？泛民比（被）DQ就要重奪議席，其他人比（被）DQ就去搶人議席，咁又幾好喎！」「韓偉傑」更爆粗話：「講到咁×偉大，本土派個兩席呢？割×夠席未啊？人渣！」
「眾志」粉「Vernon Ng」就反唇相譏：「梁天琦都入左（咗）獄，我都想問下，本土派d（啲）人呢？聲都唔聲下既（嘅）？......仲係靠鬧人刷存在感呀？」「Rasaid Tsang」也道：「你用自己把口，講一次梁游依（??）家做左（咗）D（啲）乜先，自己都講唔出口，就收得皮。」
「Ka Fu」也反擊：「咁我想問周庭做過啲乜？當日雨傘第一個割席走人係邊個？而𠵱家有位上就返嚟，唔怪得香港越嚟越×街喇，未（咪）多得你地（哋）呢班泛民支持者囉！」
已報名參加港島區補選者還包括陳家珮及任亮憲。■香港文匯報記者 羅旦