■長毛日前在fb叫市民一齊唔好交稅。 社民連fb圖片𠵱家講DQ，大家諗起「中箭（香港眾志）」周庭、諗起明明冇俾人DQ嘅蟲炎（姚松炎），諗埋「青症雙邪」，都醒唔起社民連長毛（梁國雄）呢位阿哥，都係時候刷下存在感嘅。長毛啱啱個星期日就喺反DQ集會度叫大家考慮罷交稅行動，希望可以組織到百萬人實名參與去反DQ喎。有反對派中人就踢爆，唔交稅根本就唔可行，稅局可以直接喺你公司或銀行戶口扣錢，質疑長毛咁建議，但又唔理法律後果，「同叫人×衝有咩分別？」唔通長毛一直都乖乖地交稅又話你知咩？佢都係講吓啫。有網民就指出，佢𠵱家住公屋又冇咗份工，稅都唔使交，咁就更加唔知啦。
長毛日前就叫大家一齊唔好交稅，懶煽情咁話：「無代表，俾（畀）錢你？食懵左（咗）呀？」佢仲話，「公民不服從」不單只係「佔路」咁簡單，大家要「有耐性，要勇敢」，希望可以爭取到50萬至100萬嘅實名支持，行出嚟同政府講反對DQ喎。
快必叫人咪響應曲線撐
呢啲咁嘅絕世好橋，應該得之前諗咗個叫民協老馮（馮檢基）頂上補選再辭職嘅「人民力量」快必（譚得志）認同。快必之後就好似執到寶咁，喺facebook出文曲線咁叫大家「千祈唔好」響應長毛，仲煞有介事咁話「中共港共好乸唔鐘（鍾）意的」。
支持反對派的設計師陳書就頂長毛唔順，喺fb質問︰「喂阿哥叫人唔好交稅，而我想請教，咁樣同叫人×衝有咩分別？」佢仲分享自己唔記得交稅嘅經驗，話當你多次忽略咗稅局嘅繳稅通知同警告之後，「稅局就會話俾（畀）你老細（闆）知，同時直接凍結你嘅出糧戶口（扣糧作繳稅用途），如果最後都仲係唔交，或被查出欠稅理由唔充份（分），就會作出提告。」
至於有人話要分期交稅，陳書都試過，話如果真係有經濟問題而要咁做，稅局係容許嘅，但收返你附加費囉，「如果你擅自分期而冇遞交相關文件證明你無力繳稅，稅局一樣當你係逃稅人口，結局同冇交全數一樣。」佢仲話，稅局就連退十幾蚊都好盡責，勸啲諗住加重稅局工作負擔嘅人︰「你哋夠人去搞佢哋先算啦。」
佢最後再鬧長毛︰「喺冇周詳計劃之下叫大家唔交稅，亦冇教大家點樣面對、承擔由欠稅所帶嚟嘅法律責任，咁樣同叫人×衝真係有分別咩？」
網民「Oscar Lam」亦分享自己唔小心交少咗十幾蚊稅嘅慘痛經驗︰「 HR（人事部）打黎（嚟）話直接係（喺）份糧到（度）扣，之後我老細（闆）的（扚）咗我去傾計（偈）問我係咪好唔掂。所以唔交稅到最後都係自己瀨野（嘢）多。」「Zoe Yung」就直言，除咗扣糎（糧），稅局仲可以叫銀行幫你扣。「Paul Leung」就話︰「差（欠）政府錢好似係出唔到境，例如遠期牛肉乾。」
失業住公屋 瀨嘢無佢份
咁點解長毛仲會咁建議？咪就係其實佢冇真係試過咁樣唔交稅法囉，你唔係信佢係嘛？「Jayden Keung」就揶揄︰「長毛失業又有公屋，緊（梗）係吾（唔）洗（使）交稅啦！」 ■香港文匯報記者 甘瑜