敗走立法會補選嘅姚松炎（蟲炎），喺反對派「初選」當中點樣夾走民協老鬼馮檢基、點樣當規矩無到，明眼人固然睇得出，「民主動力」召集人趙家賢更加百般滋味在心頭。估唔到補選過後，姚松炎係都要咬住趙家賢唔放，今次就搞到對方區議會地頭太古城，又話要畀企業起「合作社房屋」，又話要搞「無車城市」，趙家賢作為「城主」梗係唔放過佢啦！更質疑佢嘅建議天馬行空，令居民感到家園受到侵犯，更加叫佢凡事要有商有量，保持「民主派」應有的合作及協調噃，咦咦？語帶雙關喎。
姚松炎今次係以「房產發展研究中心」創辦人名義提出建議，包括喺東區走廊經太古城海濱一段上蓋起露天平台，作為行人專用區同休憩區，創造「無車城市」，同埋將鰂魚涌公園再規劃，釋放較偏遠嘅部分畀企業起「合作社房屋」，再以合理租金租畀員工，咁就辣着咗趙家賢。
趙家賢噚日出咗個聲明，都幾有火藥味，話社區持份者喺社區規劃嘅參與非常重要，尤其對於一直倡議「民主參與社區規劃」嘅政治人物，更應先諮詢後規劃，確保居民意見被尊重，而佢自己就無可能支持任何未經公開公平諮詢嘅社區規劃嘞，因為佢同另一個太古城區議員仲有成班業主，從來未曾獲邀交流，「如任何『民主派』朋友對太古城區有任何重大建議，實應有商有量，保持民主派應有的合作及協調。」
批建議太天馬行空
趙家賢更批評，如果要搞「無車城市」，就要將太古城區內馬路全面變成行人專用區，亦即係將太古城連接東廊嘅出入口封閉，加上將沿海期數對出嘅鰂魚涌公園起「合作社房屋」，仲有喺東廊興建架空上蓋，都會影響現有景觀，「在本人及居民眼中極為天馬行空，甚至感到十分厭惡及家園受到侵犯。」 ■香港文匯報記者 陳庭佳