■廖書蘭出新書講新界歷史，林偉強話要送畀特首同主要官員睇吓。 香港文匯報記者朱朗文 攝本身係作家嘅新界鄉議局議員廖書蘭噚日同傳媒茶敘，介紹佢籌備咗成十年、趕及喺今年書展前出版嘅著作《被忽略的主角──新界鄉議局發展及其中華民族文化承傳》。顧名思義，廖書蘭覺得新界原居民應該要更受尊重同重視，仲引經據典提醒特區政府，話如果要將香港管治好，要先讀懂新界呢本書：「一室之不治，何以天下國家為？」
廖書蘭話，其實大部分新界原居民安分守己，好似當時港英政府要收地起萬宜水庫，受影響村民其實都好配合，但係問到交通問題嘅時候，就換嚟港英官員咁樣回應：「係咁㗎啦，唔啱就游水出西貢囉。」睇嚟政府收地如果處理得好唔好，村民真係會一直記住㗎。
陪廖書蘭見傳媒嘅鄉議局副主席林偉強就話，本新作應該要送畀特首同主要官員睇吓，令佢哋解決新界問題時有更多相關知識。
明年底出發叔傳講趣事
佢仲預告出年年底會出一本有關鄉議局前主席劉皇發嘅書，暫時叫做《發叔的故事》，而佢呢十年嚟訪問咗好多發叔嘅身邊人，包括發叔嘅親人、同村兄弟，同埋幫發叔揸咗成四十年車嘅司機。
佢更加劇透咗唔少發叔生前嘅趣事，好似發叔嘅媽媽就話，發叔細個曾經養過一隻了哥，每當發叔返屋企嘅時候，隻了哥自然會叫「發哥返嚟」，原來係發叔自己教佢講嘅！
另外，原來發叔自小就好樂天，廖書蘭引述「發媽」話，發叔細個會帶飯盒去耕田，點知有次落大雨，雨水沿住佢帽邊流到落佢飯盒度，不過佢無有怕，話當泡飯食算數。 ■香港文匯報記者 朱朗文