■「東九龍社區關注組」當年製圖鬧爆反對派出賣觀塘居民。 fb圖片有人就會有政治，有政治自然就梗係有爭拗㗎啦。近日，立法會工務小組委員會否決觀塘噴泉撥款項目，一直反噴泉嘅「東九龍社區關注組」發言人宅滔（陳澤滔），亦因為民主黨議員尹兆堅喺會上引用咗�哋嘅調查結果而興奮非常，出帖話「好好醜醜都叫贏咗」，但又同時貼張自己曾經畀咗1萬個反對噴泉簽名畀當年仲係民主黨主席嘅劉慧卿嘅相，話「張相係一世做得最錯嘅事」，乘機踩返民主黨一腳。結果，有民主黨議助挑機問啲簽名去咗邊，宅滔就反擊，話係民主黨唔見咗�嘅簽名，應該係民主黨交代返件事。
觀塘噴泉撥款項目，其實上屆立會已經上過工務小組，而當時因多名反對派議員缺席而通過，「東九組」就發帖狠批缺席者。不過，有關項目喺反對派財委會拉布下間接拉死埋，結果重頭再來，今屆會期再上工務小組，結果被反對派否決。
宅滔送簽名 卿姐無回頭
宅滔興奮之餘，多謝呢個多謝嗰個，但就出咗卿姐接佢反噴泉簽名張相，話「張相係一世做得最錯嘅事」、「要警惕自己」，又戴埋頭盔話：「唔係贏咗都唔會放出嚟。」不過，有民主黨議助睇完後，唔知點解叫佢解釋吓將啲簽名畀咗劉慧卿後，件事「無疾而終」，點解佢哋會唔追問對方喎！
宅滔就發帖回應，話應該係民主黨交代佢畀咗劉慧卿嗰1萬個簽名去咗邊，「卿姐當日係話幫我交上panel，我呢啲小組織唔知程序係點，但到呢刻都無見過，希望民主黨都可以解釋返。我哋其實都問過卿姐議辦一次，佢哋話唔見咗，我諗民主黨議助朋友唔係好接受到呢個答案，所以都想民主黨交代返。」
唔見人哋嘢 仲問返轉頭
唔少宅滔老友就寸爆民主黨。「Sanho Chung」話：「點解係人地（哋）做漏嘢然後人地（哋）會問返你轉頭啲嘢去咗邊咁好笑，明明唔理其實就皆大歡喜，點解係都要拎出嚟×......」「Rachel Au」也恥笑：「係咪白痴，嫌自己個朵未夠臭呀，响呢啲時候仲大人唔敢揭自己啲屎出嚟！」
有人就「懷疑」該民主黨議助「另有所圖」。「Anthony Yan Ting Cheong」揶揄：「民主黨議助搵東九質疑白鴿黨內部處理方法。即係點？內銷變外銷再變內銷？」「Jay Chim」也道：「內鬥變外鬥囉，借刀囉！」 ■香港文匯報記者 陳川