■神駒於fb度瘋狂恥笑「熱狗」玩「倉庫番」。 仇思達fb圖片300個訂購，300個訂購，係300個訂購啊！雖然話重要嘅嘢要講3次，但其實係乜嘢呢？咪就係「熱狗」前「首領」狗達（黃洋達）喺facebook度含淚跪求課金訂購佢個網台計劃囉！話晒都曾經係「萬人台」，狗達求課金時都一路聲稱有好多人嚟書展支持佢哋，好多人「實在很愛戴這個台」，但又話個計劃仲差300個訂購，先可以以「最低標準」開始喎。有網民就揶揄班「熱狗」話︰「轉行賣熱狗啦！」
殘兵焗課幾倍 打腫臉充「胖狗」
「熱狗」班人自稱為「最強頻道」、「全新綜合娛樂台」嘅網台計劃，由於冇乜人理，狗達日前就宣佈嘗試限米煮限飯咁以「最低標準」去運作嘞。咁最低標準係幾多呢？原來就係3,000個訂購。
原本咁聽都覺得咁「熱狗」都算係咁啦，3,000爭300啫，但有「熱狗」中人就踢爆，原來訂購咗嗰啲，都係由班僅餘「熱狗」狂迷一人課金幾份而嚟嘅。見到佢哋咁樣，真係忍唔住講句︰「係愛啊？定係責任？係傻啊！」
疑似「熱狗」中人「Jūbei Ake」前晚喺狗達個「笑死朕」facebook群組度留言，問狗達點靠少數人去維持個計劃，「唔明白由1,500人砌出嚟嘅訂戶數點樣持久營運落去」，仲叫佢「唔好拎支持者d（啲）錢嚟賭一鋪好喎。」結果狗達唔覆人都算，仲要刪埋post當冇事發生過，所以話方丈份人真係好小器！
狗檔書展慘蝕 蟹貨不動如山
不過，只要一有花生派，成班「益友」當然即刻為意到啦，即使post已刪，但圖已cap，仲貼埋上專門針對「熱狗」嘅fb專頁「你課金我補選」度鞭屍加恥笑。
睇返啲截圖，「熱狗」班人一俾人質問就起晒鋼，直接就話對方都冇買，又話對方係「鬼」喎，有人仲話自己自願，問關佢咩事添。「Jūbei Ake」直言班「熱狗」「冇人肯面對個問題」，再非常直接咁話如果一排之後大家唔肯再一人訂成幾份，咁個「最強頻道」咪又係執笠。
有時可能真係衰開有條路。萬人台「頓變」連300個訂購都要死乞爛乞，個書展檔攤喺前日最後一日亦要搬返晒啲賣唔出嘅書走。「無敵神駒」仇思達噚日就喺fb上踢爆「熱狗倉庫番」，話《熱血時報》隔籬所有攤位喺書展完之後都已經清晒，惟獨得「熱狗」搬咗幾個鐘都仲未搬完，蟹貨堆積如山，又瘋狂恥笑狗達同佢老婆殘獸胃（陳秀慧）「蝕到傻」。
成班「益友」都唔放棄呢個攞景贈慶嘅機會。「Jimmy Chan」問︰「嘩！宜（𠵱）家開檔定收檔？原封不動。」「Tony Mak」揶揄︰「體育救世之搬蟹貨。」「Harris Wong」建議︰「攞去執笠倉清左（咗）佢啦！」「香港文匯報忠實讀者」JoJo Wu亦配圖恥笑：「下一站回收場？」
唔知狗達喺書展度見到所謂「好多支持者」到底係乜嘢呢，但就大家所見，《熱時》銷量淒慘就已經用咗一箱箱剩貨嚟證明。其實脆脆地咪認冇人課金囉，分分鐘仲有更多善長仁翁去「救救『熱狗』」呢！ ■香港文匯報記者 何西