■連班黃絲都頂你班「賣小強」嘅唔順。 fb截圖新的區議會選區劃界建議一出，反對派各黨派見有128個現選區須重新劃界，就即時「對號入座」，話自己受到影響，一定係「政治打壓」。但其實，如果計受影響嘅席位，其實民建聯佔最多喎。有「自己友」都睇唔過眼，話改劃選區「兩邊（反對派及建制派）嘅票都有移動」，除非證明到個區係明顯偏向某政見，否則「市民只會覺得你無理取鬧」，仲揶揄：「小強唔係咁賣架（㗎）。」（博同情）
在選舉管理委員會公佈新選區劃界建議後，各反對派紛紛「訴苦」，話自己受到「打壓」。好多人講身為民主黨元朗北朗選區議員嘅鄺俊宇近半選區被劃走，但其實，民建聯離島東涌南選區區議員周浩鼎亦係受害者噃，佢仲估計被剔出的人口最少有兩萬人。
陳恒鑌：建制喺長洲「被撕票」
講到其他區，長洲原本有兩個區議會議席，現在都係建制派議員擔任，分別為民建聯的李桂珍和前經民聯成員鄺官穩，但新建議將長洲兩個選區合併為一個。
民建聯新界西立法會議員陳恒鑌就在fb呻「建制派才是最大受害者」：「是咁的，如果白鴿話呢隻（重新劃界）叫『被綁票』，咁長洲呢個情況，建制派就直頭係『被撕票』......請問邊個慘啲？」
網媒《香港01》就做咗個統計，雖然以「比例」來講，民協及「新民主同盟」似乎最受重新劃界影響，前者受影響者近半，後者亦有四成。建制派政黨中，經民聯有三成八現任區議員受選區重劃影響，民建聯亦有逾三成區議員的選區重劃。
不過，如果講受影響人數，其實民建聯先排第一，受影響的有36人，民協得13個區議員，受影響的有6人，有12個區議員的「新同盟」則有5人受影響，加埋都唔夠民建聯受影響人數多。
無病呻吟博票 黃絲都嫌亂吹
睇到反對派各黨派係咁話「政治打壓」，被視為Cheap禎（游蕙禎）Plan B的袁健恩就在fb發帖，叫佢哋「唔好吹太大」：「其實唔係區區都Gerrymandering，??走一幢樓，係兩邊嘅票都有移動。除非證明到個區係明顯偏向某政見，否則係冇咩好講，市民只會覺得你無理取鬧。不如從居民角度出發睇下投票方唔方便好過啦。」
佢仲標註咗「小強唔係咁賣架（㗎）」。「香港眾志」秘書長黃之鋒、社民連成員施城威等都有畀Like。
「黃絲」攝影師林健恆就留言：「其實係要由影響選民同埋浪費行政費用黎（嚟）講，仲要重新宣傳某D（啲）區域可能要改地點投票引起不便之類......講選情只會引人反感。」「袁健恩」回應：「無錯......市民只會覺得你只顧自己得失。」 ■香港文匯報記者 陳川