■朱隊友昨日凌晨在fb轉載電影《我不是藥神》，涉嫌侵權。 fb截圖反對派議員成日口講法治，但最經常帶頭違法嘅就係佢哋。「自決派」立法會議員朱隊友（朱凱廸）近日又整多個示範。曾經任職記者、算係半個「傳媒人」嘅佢，繼早前喺大會動議新聞界離場，得罪所有記者行家之後，噚日竟然喺facebook分享涉嫌侵權的電影，結果就俾網民質疑佢「點解唔買飛？」朱凱廸點回應呢？咪就係刪post當冇事囉，好出奇咩？
電影《我不是藥神》啱啱喺內地上映，已經登咗上票房冠軍，其熱潮惹來不法之徒分一杯羹，有網民喺facebook上載長一小時五十分鐘嘅《我不是藥神》全片，瀏覽次數逾7萬次，仲有超過2,000個分享轉發。其中一個搞彎電影業嘅人，咪就係朱凱廸囉。
為抽水害影業 被篤爆始偷刪
朱凱廸喺自己藍剔fb專頁分享咗呢個侵犯版權嘅帖。犧牲人哋嘅版權，原來就係想話：「看疫苗造假案，就明白為什麼這套諷刺中國醫藥界的電影如此賣座。」
想抽水都唔係咁抽㗎？唔少網民睇唔過眼留言。「Felix Leong」話：「的確係好片，不過我建議你post trailer （預告）好啲。」「Bon Bon Chow」就講：「呀……不如你俾（畀）錢入場睇正版先好無？」
「KisTing Yee Ting Lo」更直斥其非：「分享成套電影並不恰當喔！」「Wan Chi Chung Dennis」質疑：「點解唔買飛？……點解？」
《我不是藥神》今個月初先喺內地院線上映，至今仍不足一個月，可以話新鮮滾熱辣，而據聞串流影片播放平台Netflix已買入其版權。
朱凱廸貴為立法會議員，咁大模斯樣嘅侵權真係講出嚟都嚇死人，但更得人驚嘅係佢嘅反應，直接刪post當冇事，對唔住都冇聲，真係幾咁有問責精神呢。 ■香港文匯報記者 范童