梁振輝 香港資深出版人
輝仔：阿爺阿爺，你睇我抱住Lucky仔喺度係咁轉，佢幾開心！
爺爺：咁轉法，人唔暈，狗都暈喇！
輝仔：嗱，呢招海洋公園「海盜船」就夠晒刺激嚹啩！
爺爺：輝仔，你將Lucky仔拋起，跌落嚟接唔住就真係刺激嘞！仲有呀，你玩海盜船嗰陣「個心都會離一離1」喇，狗唔會個可？
輝仔：唔係第一次咁玩個囉噃，佢都冇出過聲！
爺爺：你估佢係人嚟咩，至多咪吠兩聲！乖孫，做人要將心比己，如果你畀人轉來轉去、拋上拋落，你會唔會覺得好過癮吖嗱？
輝仔：我諗我會「伸佢一腳2」囉！
爺爺：咪係囉！唔好以為自己係主人，佢喜唔喜歡你唔在乎；我可以話畀你聽，你繼續咁玩佢法，遲早你會畀佢「噬3」一嘢嘅！
輝仔：乜狗唔係人類嘅朋友咩？
爺爺：唔咬你嗰陣就係囉！
輝仔：咁我以後會「睇住」嚟玩㗎嚹，哈哈哈......
爺爺：講開畀狗咬，阿爺同你玩下估嘢呢？
輝仔：估中有冇獎先？
爺爺：估得到，麥當勞！
輝仔：講過要算數呀吓！
爺爺：邊種人畀狗咬完唔會嗌嘅？
輝仔：畀狗咬會痛個噃！唔嗌，除非係死人喇！
爺爺：錯，係小偷呀！
輝仔：阿爺做乜咁快開估啫，我就快估到㗎嚹！
爺爺：咪扮嘢！咦，話時話，早兩日你阿嫲響增城攞咗盒荔枝番嚟，今年「當造4」，粒粒又大又甜，你有冇食過呀？
輝仔：阿嫲話，「一粒荔枝三把火5」，話我細佬哥至多可以食兩粒，咪畀咗兩粒我咁大把囉！你唔講起我都唔記得，我擺咗響床頭度，仲未食！
爺爺：擺響度，遲啲就爛㗎嚹！
輝仔：好，即刻過去攞嚟食！（轉過頭）......阿爺，好激氣呀，畀你噏中咗嚹！
爺爺：乖孫，我隨口噏咋噃！
輝仔：你以為係擺爛㗎，係畀Lucky仔咬爛㗎！
爺爺：吓，「養狗咬荔枝」，肯定係報復你成日玩佢喇，唔咬你咪算好彩囉，哈哈哈......
小孩看到狗兒蹦蹦跳跳的，自是興奮不已；須知，一得意就忘形，於是便不自覺地做出一些狗兒不只不悅還會惱怒的事，如：抱着狗兒在空中轉圈；把狗兒拋起來再接住。一般情況下，狗兒是不會第一時間發難的，但如你不以為然，甚或變本加厲，牠終會按捺不住--撲過來咬你一口。廣東人就有以下的歇後語：
細佬哥玩狗--終歸「捱6」一口
比喻危險事情做多了，遲早會出事。再說，狗始終是動物--「冇性」，行為反常，不足為奇， 所以不只小孩不應「玩狗」（耍弄狗兒），大人也應有所避忌，否則與「玩火」無異。
小偷在進行其「活動」期間，如不幸被「看家犬」咬着，即便有痛楚，也不會叫出來；叫了，家中便有人發覺他到來偷東西了。廣東人就有以下的歇後語：
小偷畀狗咬--暗啞抵
「暗啞抵」中，「暗」指暗地裡，「啞抵」指啞忍。「暗啞抵」比喻做了不道德或不合法事情的人，即便吃了虧，也不敢張揚或申訴，只有暗地裡抵受着，如同：
啞仔食「黃連7」--有苦自己知
（啞巴食黃連--有苦難說；吃啞巴虧；吃悶虧）
「睪丸8」，呈橢球形，有兩顆，藏在陰囊內，是雄性動物生殖器官的一部分。廣東人會以形似的「荔枝」作為「睪丸」的委婉代詞。「睪丸」如被養的狗所咬，主人大有可能喪失生殖能力，導致傳宗接代無望。對於牠這個行為，大家可會意識到主人是何等的心疼，狗兒是何等的歹毒？以事論事，此惡行已大大地超出「忘恩負義」的範圍了！廣東人就用以下的俗語來形容那些人受恩不知報，反而做出極度傷害恩人的事：
養狗咬荔枝
這也是對施恩者的一點既無奈又可悲的忠告--要對受恩者作出有限度的防範。
中國傳統的思想，重大體，對好一些事物，如涉及「性」這類敏感話題，多被界定為「不雅」，是故絕少宣諸於口或行筆成文。就是這樣，描繪事物的傳神度在某程度上打上折扣。然而，這種「禁忌」在方言上取得很大的包容性和補充性，今期提到的「養狗咬荔枝」便是一個上佳的例子。只要心無邪思、意無邪念，加上不戴上有色眼鏡，大家不難發現當中的描述是那麼的到位、寓意是那麼的深遠。
__________________________
1.中國人會以「心」比喻「靈魂」，「個心離一離」指在片刻間魂不附體，那就是頓時有點慌張；人每每在遇上突如其來的事情時有此反應。
2.「伸一腳」指把腳一伸，即踢。
3.「噬」，文讀「誓」，白讀「誓6-4」。
4.「當造」指到了吃某種水果的時節；「造」，讀「灶/造6-3」，指農作物的收成或收成的次數。
5.荔枝性燥熱，過度進食容易出現生痱滋或喉嚨痛等徵狀，廣東人稱之為「熱氣」（上火），所以民間就有「一粒荔枝三把火」的說法。
6.「捱」，同「挨」，讀「崖」，遭受的意思。
7.「黃連」是中藥裡最苦的藥材。
8.「睪」讀「高」，而非「澤」；「丸」的口語讀音是「婉/丸4-2」。
【專欄簡體版】https://leoleung2016.wordpress.com/
