反對派過去幾年嘅選舉分裂再分裂，瀨嘢再瀨嘢，要好好哋定個位都真係唔容易。話說出年就係區議會選舉，又係一班激進反對派年輕人出嚟搶位嘅時候，《蘋果日報》噚日就標咗一班人做「去政治化」嘅「新一代傘兵」，明顯係想幫呢班激進嘅年輕人洗白，點知就自己人都唔多接受，一班反對派支持者嗌晒大交，有人質疑「傘兵」即「港獨」，《蘋果》咁樣標籤係咪想整死佢哋，亦有人留言問：「強調自己係『傘兵』，但又話唔講理想。即係咩？冇理想冇社區服務經驗。」
《蘋果》噚日篇報道聲稱「新一代傘兵崛起」，仲揚言佢哋係「去政治化」、「主打民生議題」喎，睇過係啲咩人？首先被點名嘅「維多利亞社區協會」副主席李永財，既反對國歌法，仲走去參加戴耀廷個「風雲計劃」培訓班。
李軒朗公器私用被逼走
被形容為「曾經是學聯秘書長、其後辭任」嘅「九龍角落」主席李軒朗，睇返資料，其實佢當時係因為將學聯公器私用，擺佢啲「九龍角落」物資，俾人出埋聲明鬧，所以先辭職，而個facebook某專頁版主鍾禮謙就曾經喺違法「佔領」清場嘅時候被捕。班「去政治化」嘅新一代「傘兵」大概就係咁囉。
咁網民又點睇呢？「Kenneth Kent」話︰「區議會主打民生議題，方向正確。」不過更多人鬧佢哋九唔搭八。「Leo Hau」揶揄佢哋係「唔講政治既（嘅）政客」。「Eric Cui」亦質疑︰「『傘兵』空降社區搞社區民生？唔好玩啦，唔系（係）自己地頭，真系（係）咁好死？」「Dadude Nowyouknowyourabc's」反問︰「強調自己係『傘兵』，但又話唔講理想。即係咩？冇理想冇社區服務經驗。」
平時鬧建制 又要學建制
有人就畫公仔畫埋出腸，話班人講咁多，其實都係想學建制派嗰套地區服務，但平時鬧建制、𠵱家又要學，就令到班反對派支持者係咁嘈。「Marian Leung」反問佢哋︰「係咪即是加強蛇齋餅糭呀？」
「Jack Wong」︰「俾（畀）你選到，初心理念基本講唔到出口，一講就DQ，講地區工作，咁即是變成基哥（馮檢基）、民主黨一樣，到時會有『新新新傘兵小朋友』用上年你地（哋）插基哥的理由插番（返）你，……專心做街頭就可以勿忘初心了。」
「Jeffrey Chu」都唔知係想幫口定補刀︰「咁做先啱，班老野（嘢）邊識乜野（嘢）831框架、『一地兩檢』呢D（啲）野（嘢）丫（吖），總之邊個幫佢地（哋）量血壓同送野（嘢）俾（畀）佢地（哋），佢地（哋）就投邊個嫁（㗎）啦。」
「Sam Hui」直言︰「『傘兵』咪即係『港獨』分子，『毒果』講呢啲。」「Ka Kin Mo」亦話︰「仲傘咩鬼兵。 畀（俾）人標簽（籤）埋仲死。」講開又講，2018年啦，你仲以為話係「傘兵」就會有票咩？■香港文匯報記者 甘瑜