薪高糧準仲可以隨時走去做副業，呢啲咪反對派立法會議員嘅心聲囉。話說日前食物及衛生局前局長高永文話自己唔會參加九龍西補選，因為「唔能夠做稱職議員，唔只係對自己唔住、對病人唔住、亦係對社會唔住」，中大「獨」講師劉正即刻喺自己facebook專頁「無神論者的巴別塔」度出文，話呢句說話擲地有聲，兜巴摑埋去陳沛然、郭家麒兩位醫生面上，同時應用喺莫乃光、梁繼昌、葉建源、郭榮鏗之流，問佢哋︰「唔知呢班垃×圾會唔會向市民道歉？」
成日追蹤住班議員有冇開會嘅劉正喺個post到話，立法會入面兩個醫生，即係陳沛然、郭家麒，「事實上呢兩條友成日因為出診而缺席立法會會議，卻又從來無解釋缺席理由，十分傲慢──盛傳郭家麒逢隔星期五都有出診時間，所以同（民主黨）黃碧雲一樣老奉某啲時間就係唔會開會，而班『黃屍（絲）』又可以覺得完全無問題。」
「直選」有樣學樣 去旅行唔開會
劉正仲話，除咗佢哋，其他功能組別議員，包括IT界莫乃光、會計界梁繼昌、教育界葉建源、法律界郭榮鏗，都係「鍾意開會就開會、唔開就唔開」，批評佢哋完全唔尊重作為一個立法會議員，社會對佢哋嘅期望，「然後當地區直選議員見倒（到）呢班政棍公然偷懶完全唔會受到懲罰，自然有樣學樣，大家齊齊去日本旅行唔開會，結果議會淪亡，議員既不『抗爭』、亦不盡責。」
就因為咁，高永文日前嘅說話，帶出議員唔盡責係對社會唔住嘅訊息，劉正亦即刻鬧呢班反對派議員「咁×忙就唔該辭職唔做」、「唔知呢班垃×圾會唔會向市民道歉」。
不過，佢相信班反對派議員只會繼續恐嚇選民、搵走狗出嚟包庇，甚至覺得自己好偉大𠻹。
網民「Allan Yip」亦慨嘆︰「其實只係基本要求，即使做到都唔算出色議員，係唔係日日準時番（返）工老細已經要大讚不絕呢位員工？而（𠵱）家仲講緊有無出席咁低層次，呢班議員真係失敗！」
網民力數呃市民5部曲
「Dhename Dhe」直情歸納埋反對派呃市民嘅5部曲，首先係喺議會「表演完鬧人後」就蛇王，二係叫啲收公帑人工嘅助理剪返段片擺上網呃Like，三係從來唔提自己缺席或棄權，四係每日洗吓版、轉貼吓新聞去呃Like抽水，五係完全唔使理立法會嘅議員職務。又形容得幾傳神喎。 ■香港文匯報記者 甘瑜