■「JoJo Wu」希望老馮去馬玩補選狙擊小麗老千。facebook截圖老馮，其實你唔使咁激氣，原來仲有一班「益友」撐你。好似「陳興旺」就問主流反對派「其實馮檢基衰乜」，如果係衰「又傾又砌」，咁𠵱家民主黨、公民黨都行緊呢條路；如果係衰唔肯退，咁李卓人𠵱家都係密謀緊做小麗老千（劉小麗）「Plan B」，「上次九西補選，又都有傳年過60的梁家傑做『Plan B』，又係無事。另一邊廂，新東嗰件長毛賊（社民連梁國雄）選到死都唔讓位畀黃浩銘啦。」
網民「Wilson Sham」就嘆道：「餅就愈來愈細，手段呢？就愈來愈下流！」「Vicky Ng」則寸爆小麗老千：「話時話想睇如果小麗老千當選又到宣誓，唔知佢會否覺得誓詞虛妄呢？照道理誓詞起碼50年不變，咁點？又玩嘢，然後永續參選，因為個位佢嘅，佢選唔到畀佢仔女選？」
「神駒」仇思達早前就喺網台節目度，支持俾小麗老千班「民主派」迫退嘅老馮參選，仲教佢質詢小麗老千喺前年選舉嗰三寶，即係「全民免供退保」、成立義工隊同捐一半人工，揭破小麗老千嘅千術，咁肯定會令對方跌票喎。「香港文匯報忠實讀者」JoJo Wu就轉發咗《點新聞》就呢單新聞製嘅圖，叫老馮如果真係玩補選，麻煩幫大家質詢呢三壇嘢。 ■香港文匯報記者 陳庭佳