![■老馮向袋鼠碩同高達開火。 facebook截圖](http://image.wenweipo.com/2018/08/08/a11b.jpg)
11月又有一場立法會九龍西補選,離開咗民協嘅老馮(馮檢基)選唔選呢刻仲未知,但上次補選同反對派「初選」嗰條氣就肯定未順返晒,日前再上網上節目炮轟「民主動力」創會召集人袋鼠碩(鄭宇碩)同佢徒弟、「民動」召集人趙家賢,批評佢哋一早已經密謀踢佢出局,而成場「初選」都好多漏洞,最後連出席其中一次「屈基」會議嘅民主黨前主席高達(李永達)都鬧埋,問佢同袋鼠碩身為元老仲夾手夾腳迫走佢,仲係咪「民主派」喎。
老馮日前上咗一個網上節目度做訪問,被問到11月仲選唔選九西,佢都係嗰句「到呢分鐘都無諗」,但點解唔斬釘截鐵話唔選,佢就反問點解要咁快脆放棄自己嘅政治權利。
至於年初反對派「初選」時佢句「最後一擊」,就係佢當時喺民協內部初選嘅政綱,意思係佢覺得唔會年年都有補選喎,而如果係比例代表制嘅換屆選舉,佢會同意搵新人去選。
爆姚松炎無睬人激親「大班」
對於佢喺「初選」當日搵大巴車街坊去投票,老馮解釋民主選舉應該容許選民可以無任何障礙咁表達意願,而九西長者比例高,佢只係想方便街坊,而佢亦都跟足「民主動力」規矩,無喺車上做宣傳,「反而係姚松炎用咗我架車做宣傳,派自己啲單張」,仲大爆「大班」鄭經翰喺正式補選嗰陣主動問姚松炎使唔使幫手,但對方無睬到人,最後激到「大班」用「呢丁友」嚟形容對方:「我企兩個鐘(助選)都2,000票啦!」
老馮之後繼續向袋鼠碩同趙家賢發炮,憶述返三次「屈基」會議,第一次係1月15日、「民動」開記招公佈「初選」結果之後,當時係趙家賢見晒6個「初選」參選人,話覺得「Plan B仲要『泛民』坐低傾」,老馮覺得對方當時已經露口風話可以改。而6個「初選」參選人當中,除咗姚松炎話會跟反對派傾完之後嘅結果,其餘5個、包括老馮自己都話機制唔變得。
批袋鼠碩「出爾反爾」
佢不滿袋鼠碩明明講過只有一個持份者反對改變機制,就唔會改機制,而1月15日個會有成5個持份者反對,點解仲要喺1月17號同18號開多兩次會傾唔畀佢做「Plan B」,質疑袋鼠碩同趙家賢腦海只有「踢走馮檢基」。被問到佢喺「初選」只係得廿零分,同姚松炎差成40幾分,「民動」或者因為咁而諗住改機制,佢就反問「民動」點解唔早響,「你講明低過幾個percent(得分)就唔好做『Plan B』囉!」
老馮之後返到去佢最熟悉嘅facebook,些牙(分享)返個節目,留言除咗繼續鬧袋鼠碩,仲燒埋代表民主黨出席1月18號嗰場會議嘅高達嗰疊,「鄭宇碩,李永達作為元老級人馬,用文革式低劣手段鬥馮檢基,是『民主派』嗎?」
可能真係做開fb管理員,佢面對挑機都毫無懼色,其中袋鼠碩有份做節目嘅網台「香港花生」主持之一 Roger Lee,就寸佢「戀棧權位同後生仔爭」、「𢱑爛腳」等等,佢先嚟一句「無權無位,何來戀棧」,再反擊對方無證據就抹黑,叫對方走返佢條鬥爭路喎。 ■香港文匯報記者 陳庭佳