立法會九龍西補選年底舉行，到時又係各候選人互相比拚嘅時刻。追擊開「自決派」小麗老千（劉小麗）嘅「神駒」仇思達前晚就喺網台節目度，支持俾劉小麗班「民主派」迫退嘅老馮（馮檢基）參選，仲教佢質詢小麗老千之前嘅3項政綱，即係「全民免供退保」、成立義工隊同捐一半人工，揭破小麗老千嘅千術，咁肯定會令對方跌票喎。
神駒喺前晚個節目講到九西補選時，一開始就提起小麗老千早前搵老馮去自己個籌款晚宴，然後又對住傳媒話老馮唔覆佢，即刻鬧小麗老千「唔好咁無恥啦」。
佢批評，小麗老千同成班「民主派」剝奪老馮嘅參選權，根本一啲都唔民主，「迫佢走係咩原因？就係因為佢有一定地區實力，有一定人脈，有一定關係，簡單講即係有票，如果唔係理××你咩？」
神駒再反問，既然老馮係有實力，「咁點解你唔捧佢？」就算唔肯支持對方，起碼都應該嚟返場實力比拚，而唔係不停出口術，又唔想佢選、又話佢唔係「民主派」咁。
「捐一半人工」空口講白話
有見小麗老千班人為咗個位咩都做得出，神駒都話自己強加支持老馮參選，仲教佢要質詢小麗老千嘅「全民免供退保」、成立義工隊同捐一半人工3項政綱，喺大眾傳媒上揭露對方嘅千術喎。
佢批評，小麗老千從來無解釋過究竟全民退保點樣可以免供，連小麗老千自己話支持嘅「學者方案」都要供款啦；至於捐一半人工，講咗咁耐都冇完整嘅每月捐款單據，小麗老千嘅名咪就係咁嚟囉。
有聽眾都打上去話，小麗老千所謂嘅捐人工、全民退保，同「泛民」嘅手段一樣，只係空談、想老人家畀票，過幾年又換口號。
佢反問，好似老馮咁認真做地區工作幫市民，咁多年付出大家都睇到，但佢退出民協後班「泛民」點對佢呢？似乎聽眾都對小麗老千感到厭惡，想老馮出嚟選，話唔定真係可以諗諗佢喎。■香港文匯報記者 甘瑜