梁振輝 香港資深出版人
婷婷母：為為，面色咁惡睇，有人激嚫你咩？
為為：正話響𨋢囉，明明滿晒人，有個男人照迫入嚟，仲越迫越埋我度！分明係想「博大霧」喇！
婷婷：為為，唔係呀嘛，你而家咁嘅「身勢1」，仲有人「博懵」，你「執到2」喇，哈哈……
婷婷母：婷婷，熟還熟，唔係咁講嘢㗎！我而家過去睇住兩隻「馬騮3」食飯，你哋傾下先！
為為：婷婷，講真，你邊「忽4」似卅到「抆5」呀？生咗兩件，仲「keep」（保持）得咁好！
婷婷：唔好話我唔提你：「女人唔操好易老，老公借啲意走路！」哈哈……
為為：你讀書嗰陣係香港田徑代表隊，點衰都有個底嘅！我哋唔操開嗰啲，「巧難」嘅！
輝仔（婷婷的六歲兒子）：媽咪呀，小米（其妹）食麻婆豆腐食到成個嘴都係晒油呀！
婷婷母：輝仔，你做大佬要識得照顧個妹㗎！去攞張「tissue」（紙巾）同佢「索油」喇！
輝仔（心有不甘）：咁我做細佬好過！
婷婷：阿媽，你同佢咁講，佢第日同啲女同學仔又咁講，會畀人誤會佢……
婷婷母：係喎，又真係有啲語病喎！
為為：咦，話時話，而家全世界爆「metoo」（我也是），婷婷你嗰陣有冇畀教練「揩油」呀？
婷婷：十幾廿年前嘅嘢點記得呀！
婷婷母：阿女，你諗番下，如果有畀人「食豆腐」，阿媽鼓勵你企出嚟「metoo」，唔好畀呢啲衰人「抽水」抽得咁過癮！
小米：婆婆呀，哥哥「食我豆腐」呀！
婷婷母：小米，唔做得咁講㗎！
小米：點解嘅？
婷婷母：大個咗你就知道㗎嘞！
小米（一臉茫然）：哦！
婷婷：講番，近期有個運動員話以前佢個教練叫佢除咗條牛仔褲畀佢按摩，話咁方便啲喎；就係因為太突然，佢唔曉反應，卒之……
為為：除褲，咁都得！畀我，我就話「大姨媽6」到，咪甩得身囉，哈哈……
婷婷母：咁恐怖，咁我哋而家就要教定小米……
小米：婆婆，係咪話「唔好」，「咪畀錢中介」呀！
三個大人聞言大笑。
在言談或行為上對婦女作出「冒犯」，規範語中會用上「輕薄」、「調戲」、「非禮」等言詞。舊時，「輕薄」、「調戲」多指用輕佻、不莊重的言行調引戲弄婦女，近似今天的「性騷擾」（sexual harassment）；「非禮」則指對女性施暴，近似今天的「性侵」（sexual assault）。到了今天，這些言詞在性質和程度上已沒多大區別—一律指佔女性便宜。除了這些，民間還有不少與佔便宜相關的用語—全球華人社會通行的有「揩油」、「吃豆腐」，廣東人喜說的有「索油」、「抽水」、「博懵」、「博大霧」、「食豆腐」。
「揩油」原指以非法手段謀取利益或佔人家便宜，後借指調戲婦女。「揩」，口語讀「鞋4-1」，擦、抹的意思；「油」、「油水」借指利益。若然某物體含有「油」的成分，在抹擦的過程中，所用物料必會「沾」上「油」。「沾上油」好比圖利，是故不難理解「揩油」的原意。
「抽水」原指通過水泵將水從低處吸往高處或布料洗滌後「縮水」。由於「抽」有取的意思，即有「沾」的意味，所以也可把「抽油水」或「抽水」理解成「揩油水」或「揩油」了。
由於英文字「soak」有使濕透或吸入的意思，且其音近「索」，有人便認定與「揩油」意近的「索油」中的「索」就是由「soak」而來，這是事有湊巧罷。查「嗍」，讀「朔/索」，有吸吮的意思；廣東人將其意引申至吸收、沾上，因而以「嗍」作為「索」的本字較為合理。「索油」一詞一般只用於佔女性便宜上。
「博」有賭博的意思。粵語中，「博」也表示伺機撈取利益，而這行為是否成功得看「彩數7」。與「揩油」意同的「博懵」可理解成：
「博」人家不留神時作出「蒙」騙
也可理解成：
「博」人一時「懵」懂而出手佔便宜
意味着在人家冷不提防或一時糊塗的情況下落手。由於「懵懂」亦作「蒙懂」，「蒙」、「懵（蒙4-2）」又音近，用「博蒙」做正寫亦未嘗不可。
大霧中，視野模糊，提供了某些人一個「混水摸魚」、「趁火打劫」的上佳環境。正正是：
下手的人在「大霧」中較易「博」懵
有人就用「博大霧」來比喻趁混亂的時機討便宜或謀取不正當的利益。筆者對「博大霧」的出處有兩個理解，其一、「霧」與「懵」諧音，「博大懵」就成了「博大霧」；其二、「孔明借箭」的故事家傳戶曉，當中諸葛亮就是「博大霧」（藉江上大霧）成功騙去曹軍約十萬支箭。
據說「吃豆腐」一詞源自江浙一帶，廣東人則叫「食豆腐」。有說喪家的「免費」弔唁飯中必有「豆腐」這道菜，有人便用「吃豆腐」借指討便宜；又有說「豆腐」又白又滑，「吃豆腐」就如「觸碰」着「年輕女子」白皙細嫩的肌膚；以舊時的道德標準，這就是討女性便宜。
___________________________
1、「身勢」指身形和體態。
2、「執到」，面意是拿到，借指僥倖地得到。
3、「馬騮」，「騮」讀「嬲」，借指頑皮的孩子。
4、「忽」從「塊」音變而來，指身體某部分。
5、「抆」，粵方言借字，讀「蚊1-3」，指很貼近。
6、「大姨媽」是廣東人對女性「月經」的暗語。
7、「彩數」，粵方言用詞，指吉利的運數。
【專欄簡體版】https://leoleung2016.wordpress.com/