為咗挑動兩地矛盾，電視台真人騷變「假人騷」？ViuTV日前播出嘅《買樓狂想#曲》，聲稱幾個主持人喺水泉澳邨嘅街訪搵唔到「本土香港人」，仲搵咗個有奇怪鄉音嘅「街坊」上去做家訪，扮係訪問新來港人士，「街坊」仲喺節目度話特區政府對佢哋「應該可以再好啲」，又話自己有好幾個同鄉住附近𠻹。節目出街當然引嚟唔少人鬧爆新來港人士「霸公屋」，不過，有眼利網民就發現個所謂「街坊」根本係舞台劇演員，仲曾經喺ViuTV另一個節目出現過𠻹，唔少網民批評ViuTV「造假」，怒問「個節目乜嘢企圖」，而ViuTV至今冇公開回應過件事囉。 ■香港文匯報記者 甘瑜
ViuTV上星期五喺佢facebook專頁度貼咗《買樓狂想#曲》嘅其中一段片出嚟，片中3個主持人就去咗水泉澳邨做街訪，但聲稱一直都搵唔到「本土香港人」，問嚟問去都係新來港人士喎，個旁白仲寸呢班人唔使返工所以好得閒喺街度hea𠻹。
最「精彩」係佢哋之後捉到個師奶做訪問，對方一開口就係奇怪嘅鄉音，扮晒猶豫之後就畀嗰3個主持人上屋企做家訪，個旁白仲強調3個主持人「符碌」，仲寸多句︰「同胞果然好人，同埋比較得閒。」
個師奶跟住就嚟料爆金句，不斷強調自己間屋好新，仲話政府對佢哋「應該可以再好啲」，又話自己有幾個同鄉住喺附近，平時就一齊飲吓茶食吓嘢咁喎，總之就係香港人恨唔到嘅生活啦。
段片最後就係3個主持人喺度話「明日大嶼」到時起公屋，但每日有150個同胞來港，「咁咪即係起個人工島畀人住？」
個節目講到咁，當然就引起唔少人鬧新來港人士啦。「John Wick」話︰「越睇越嬲。」「Matthew Chan」鬧爆︰「×，香港咁多人沒屋企！但係人地（哋）大陸（內地）一落就有屋住。」「Gloria Cho」亦都「響應」批評「明日大嶼」︰「反對東大嶼填海，睇完呢條片，我諗大家都會反對，支持取消每日150人嚟香港。」
「師奶」原來是舞台劇演員
不過，唔少心水清嘅網民都睇得出條片有古怪，覺得俾人家訪個師奶「啲戲好假」、「口音似係扮」。「LauSiu QB Kiuby」就踢爆︰「最尾果（嗰）個呀姐係ViuTV《對不起 標籤你》第十集扮『強國人』果（嗰）個香港人黎（嚟）嘅。」「Tang Daisok Lin」就起埋嗰位「師奶」底，指出佢根本係舞台劇演員，叫黃劍冰，「用舞台劇演員扮大陸（內地）人受訪者，ViuTV都幾低手，以為咁樣可引起『中港矛盾』。」
似《蘋果》畀錢陳健康召妓
好多人都鬧ViuTV立心不良。「Michael Yau」問︰「個節目乜嘢企圖？」「ChunOn Chow」亦問︰「其實ViuTV咁樣算唔算分化香港？」
「廖利昌」亦話︰「一睇就知做（造）馬，全意識形態洗腦片！甚麼『本土香港人』，目的就是搞分裂。」有人仲將呢件事同過往《蘋果日報》畀錢陳健康召妓去自製新聞一事去比𠻹。
唔少網民都質問ViuTV點回應。「Chung Lam Chi」︰「ViuTV點解釋，唔係新聞節目唔代表你公司做嘅野（嘢）可以做（造）假，係直接影響公司形象，再者個（嗰）集仲要係刻板標籤。」「Yc Ho」亦批評︰「舊時覺得ViuTV好，睇完覺得衰過《蘋果》。」
專欄作家踢爆師奶個案造假
專欄作家「阿果」都為件事寫咗篇《小心提防 ViuTV 假人騷》嘅文，除咗踢爆個師奶個案係造假，仲指出個師奶曾經出現嘅兩個節目，都係同一個監製韋嘉華。
至於個節目話水泉澳邨冇「本土香港人」，篇文就引用數據話，屋邨嘅新來港人士其實只佔23%囉。其實ViuTV個post都有唔少人留言話自己都係土生土長住水泉澳嘅香港人。
ViuTV到噚晚都冇回應
咁大單醜聞，ViuTV點回應？咪就係到噚晚都冇回應囉。