■許智峯（左）班人用擴音器嘈住人表演，仲對鏡頭笑。 網上圖片大館近年成為新嘅文化場地熱點，唔少表演團體都會申請去嗰度演出，咁又成為民主黨立法會議員許智峯（瘋峯）班人發功嘅目標啦。話說有部分居民不滿大館嘅表演發出「噪音」，許智峯同埋佢黨友、中西區區議員吳兆康日前就去咗大館度示威抗議，撞正小藝團近乎默劇咁嘅表演，佢哋都依然故我咁用擴音器大吵大鬧，即席示範點樣用噪音擾民，仲話如果主辦活動方面唔肯加入佢哋就唔走，真係又一次體現「民主霸權」。唔少網民都鬧爆許智峯班人嘅行為反智，數埋佢之前喺立法會強搶女EO手機一事，狠批佢︰「立會烚（恰）完女人仔，家吓又烚（恰）人哋劇團仔！」有人就直接問︰「仲未坐監咩佢？」 ■香港文匯報記者 甘瑜
喺大館進行嘅表演對附近民居造成「噪音」滋擾，理論上應該同返大館溝通協商。
雖然根據民主黨班人所講，大館已經調動過表演時間、調校擴音器角度、減低聲浪，但佢哋認為「情況始終不理想」，於是就話「為了民居安寧，不至日夜聲浪，為了藝團，不至局限發揮」，上星期六晚就幾條友帶埋擴音器去示威啦。
擴音器示威 向居民扮工
喂阿哥，示威都睇吓咩情況好喎。當日撞啱係本地藝團「綠葉劇團」喺嗰度演出，人哋個演出由晚上8點開始，只係45分鐘，頭半場係默劇形式，之後啲女聲和唱、同埋有人講吓台詞，完全冇用過擴音器，但許智峯班人就堅持要喺呢個時間示威，用埋擴音器去抗議大館嘅噪音問題喎。
網民「Pak Chai」就喺facebook出咗個地球post公開件事。佢話，為咗許智峯班人，藝團已經押後咗表演時間，但許智峯班人似乎係想幾時示威就要幾時示威，到藝團成員行到入監獄操場，「許智峯等人便在表演場地中間，不斷用擴音器轟炸表演。」
「Pak Chai」無奈表示，自己當下都反問許智峯，話表演都冇發出聲響，點解佢哋仲要騷擾，但向來好大官威嘅許智峯冇回應，「Pak Chai」批評︰「很明顯，許智峯等人一方面意圖破壞表演，找不到大館麻煩，便向小藝團下手。另一方面，由於場地清靜，正好讓樓上的居民清楚聽到自己的聲音，知道議員正在努力工作。」
「Pak Chai」怒斥許智峯班人一邊話「支持藝團」，一邊騷擾佢哋，「令人感到議員思維紊亂，示威只是笑話。」對於藝團觀眾方面嘅不滿，許智峯仲話如果唔係有「泛民」保育大館，早就冇呢個場哋𠻹。
大聲公吵鬧 反咬話人嘈
有觀眾都留言指證許智峯班人嘅行為。「Maxine Ling」話︰「琴（噚）日（上周六）全場根本無人開咪，無人嘈，至少五成係無聲表演，最嘈係不斷開咪大叫嘅許智峯。」「Dixon Ngai」亦話︰「可憐了表演者的心血，當晚很冷！許智峯無恥！」「Matt Haha」直斥︰「用大聲公發出噪音去反對人地（哋）嘈住你，其實幾粗暴同反智下（吓）。」
對於「Pak Chai」踢爆許智峯連畀藝團即場回應幾句都唔肯，「Ken Chung」直言︰「支持香港藝團？連講句野（嘢）都唔比（畀）你講，支咩持？你地（哋）唔係當區居民呀，唔係佢票源呀，你死你事啦，做show比（畀）市民睇攞票，唔蝦你地（哋）小藝團蝦邊個？」「Leo Tang」亦話︰「投訴好重要，但選舉前的投訴最重要！」
「Lena Joanne Delevingne」就質問，憑咩話人哋藝團表演係噪音︰「中環D（啲）人高貴D（啲），九點前唔表演得？嘈？有幾嘈？係咪超過嘈音管制標準？唔call政府機關處理？」
死撐無錯 留言賴主辦方
許智峯明顯覺得自己冇錯，仲走咗去留言回應，話佢哋已經「刻意早到」、「希望盡量不影響演出」，仲話「只要主辦單位承諾提出商討，我和吳議員會立即連同居民離開」，但主辦單位唔制，所以咪咁囉。
「Ng Yuk Ming」反問︰「所以說，你找不到對頭人，觀賞表演的觀眾就活該受滋擾？」「Ben Wong」揶揄︰「有趣的邏輯：A想搵B，但B唔出來，A就同C群講，因為B唔出黎（嚟）所以我滋擾D演出。」