■吳兆康（左）上月喺街頭唱K嘈親街坊。 網上圖片民主黨中西區區議員許智峯、 吳兆康日前去大館抗議「噪音問題」，但有市民就留言踢爆話吳兆康之前喺中環「以擺街站為名、街頭唱K為實，大聲播放音樂兼大展歌喉」，批評佢嘈親街坊，質疑佢哋既然咁關注噪音問題，咁點解又「只許議員高歌，不許百姓演戲」喎。
網民「Charles Kwong」喺「Pak Chai」篇文度寫咗篇公開信畀許智峯同吳兆康，一開頭就寸爆咁話︰「有見兩位日前帶領在大館的示威，以大聲公更大之噪音來壓制藝團劇場演出之聲浪，得悉兩位原來十分關注區內噪音問題。」
既然佢哋咁鍾意「為民請命」，「Charles Kwong」就問佢哋幾時會去中環碼頭就大媽唱歌一事為市民「挺身而出」，順便揭發埋吳兆康都曾經嘈音擾民。
「Charles Kwong」話，自己上月底喺中環見到吳兆康「以擺街站為名、街頭唱K為實，大聲播放音樂兼大展歌喉。」佢好厚道咁話，自己唔評論吳兆康嘅歌藝，「但其聲浪遠至半山扶手（電梯）皆可聽見，就本人當日體驗，絕對構成滋擾。」
網民寸「只許議員高歌」
「Charles Kwong」再踩多腳話，當日都唔見有人「駐足欣賞」，當時自己「體諒吳議員表演慾旺盛」，所以冇去報警投訴，點知一個月後就見到許智峯班人去大館投訴噪音問題，個吳兆康仲拎住「一牆之隔是民居」、要求藝團「靜」嘅示威牌，「實在倍感詫異，何故兩位『只許議員高歌，不許百姓演戲』！？而當日吳議員放歌之處，與附近民居、商舖、辦公室等更是連一牆之隔也沒有！」
「Charles Kwong」仲特登標註返許智峯、吳兆康，熱切期待佢哋回應，但結果當然係冇啦。「Pak Chai」就揶揄許智峯班人︰「真係五十步笑一百步。」「Lena Joanne Delevingne」就話︰「Charles Kwong 你咁衰架（㗎）！嚇到班民主契弟潛哂（晒）水。」 ■香港文匯報記者 甘瑜