■郭子健發帖不點名潤冼豪輝。郭子健fb截圖來自「堅離地城」公民黨今年嘅區選「推介」之一、青衣地區發展主任冼豪輝，近日出帖宣佈「成功爭取」為青衣中提供機場巴士服務，但原來係要現行嘅巴士兜多3個站，結果俾青衣區甚至葵涌區嘅居民鬧爆。所謂眾怒難犯，嗰啲平日同佢扮到好friend嘅黨友，以至其他反對派中人都由於區選近了，即刻紛紛與冼豪輝割席，仲要潤多兩句𠻹。■香港文匯報記者 陳川
冼豪輝此前喺fb發帖，話公民黨葵青團隊自2017年先後多次同運輸署及龍運巴士代表會面，商討為青衣中南提供機場巴士服務嘅建議，龍運巴士就回覆接納佢哋嘅建議。但佢嘅所謂建議，就係要目前由葵涌去機場嘅A32線，喺去到葵芳新都會廣場後要喺青衣中兜多3個站，包括青衣碼頭等先返回原本路線去長青邨，再到機場。
「成功爭取」A巴兜路害青葵人
結果，無論青衣區以至葵涌區嘅居民都劣評如潮，話設立A線嘅目的就係要快，無理由要架車兜來兜去，有人則話該路線巴士現時嘅行李架經常爆滿，兜多幾個站、接多啲客只會越搞越禍。
眼見冼豪輝俾人踩，其他反對派梗係趁機踩住自己人嘅屍體上。之前一直同冼豪輝拍晒膊頭影相、扮晒friend嘅民主黨葵青項目主任韓俊賢，當然唔敢為冼豪輝死撐，更趁對方搞到群情洶湧時踩多一腳「攞佢命」。
韓俊賢郭子健割席發帖鬧
佢喺fb發帖話「A32服務青衣南居民有必要」，「實際上青衣南居民對巴士服務需求極大，我哋絕對捍衛我哋青康路沿線居民嘅乘車需要。」佢仲話民主黨團隊一直建議要另設機場A線，服務東北葵、途經青衣中，擺明係潤冼豪輝個建議堅離地啦！
同韓俊賢一樣，之前同冼豪輝扮friend嘅「傘兵」郭子健亦發帖，不點名潤冼豪輝話修改走線時應考慮新增客源是否有存放行李的需要，所以會聯同韓俊賢提出建議，爭取改善青衣至機場/東涌巴士服務，包括另設機場A線，服務東北葵、途經青衣中，等等。
唔少兩人嘅支持者就批評，冼豪輝亂提建議，靠害居民。「Edward Chan」不點名話：「有人不切實際，完全無視A32日常對青衣南重要性，企圖先斬後奏。」Edward Chan」則表明：「強烈反對公民黨社區主任未了解A32對青衣南重要性，不作諮詢，胡亂改動路線！」
「北葵涌交通關注組」批評，冼豪輝個建議「唔止影響青衣南北居民，你仲影響緊葵涌區街坊。葵涌唯一一條可用嘅A線俾你呢個『建議』搞到慢咗，機場員工同旅客出門時間會大失預算，我希望你以後提出『建議』之前都諗清楚各方得失，因為你哋係『葵青區議會』唔係『青衣區議會』。」
郭子健在回應「Edward Chan」時就扮晒好人，話「我相信冼生是真誠為青衣人服務，而他亦已致歉，不如集中討論大家需要甚（什）麼服務，然後一同爭取」喎。