「將關組」今次驅鴿引來咁多批評，其實同呢個組織得罪人多稱呼人少有關。喺招惹「襯家」最「知名」嘅，就係「大名鼎鼎」、「將關組」嘅康城社區主任陳展浚。
冒認「學民」 黐同道議員
話說陳展浚曾經係「學民思潮」成員，但因「個人操守問題」而被勒令退出，其後更被「學民」發聲明質疑喺離開「學民」後，3次冒認「學民」成員向不同政黨索取金錢及提出協助助選。
事後，佢話報道呢單嘢嘅《壹週刊》「出名亂寫」，所有指控都係失實喎。
落區後，佢經常上去將軍澳居民開嘅fb專頁，睇吓區內有咩即時新聞，然後就走去打卡扮關心地區，俾居民插爆，最後俾有關專頁踢出group。
喺上屆區選，陳展浚聯同「地區好友」與「新民主同盟」講數，稱若「新同盟」派人去軍寶區參選，他們就會派員到已「劃畀」「新同盟」的選區「鎅票」，「一命換一命」，搞到對方去廉署投訴。
又試過去有意同佢爭將軍澳富藍選區嘅對家「將軍澳青年力量」嘅fb留言挑機，鬧人「鎅票」。
陳展浚仲試過多次喺地區街站掛上其他反對派立法會議員嘅旗幟，試圖誤導居民以為佢係為某議員工作。
例如，佢曾經喺未經公民黨立法會議員楊岳橋同埋其他議員嘅同意下，喺自己的海報印上「楊岳橋議員辦事處」嘅字眼等等，最後俾人踢爆。 ■香港文匯報記者 陳川