■鄭伊健與Nowhere Boys在校園內拍MV。香港文匯報訊（記者 李思穎）鄭伊健與同屬寰亞唱片的師弟樂隊Nowhere Boys合唱新歌《時光歲月》，Nowhere Boys主音Van在生日當天得悉與偶像合唱時，簡直開心到想喊，之後又可以一齊拍MV，難怪Van高呼「成就解鎖」！
《時光歲月》一曲原本由伊健獨唱，但他聽完Demo後提出合唱，本身是伊健粉絲的Van生日當天得知喜訊後開心到想喊，豈料完成錄音後，伊健還爽快答應一齊拍MV，實在是驚喜一浪接一浪。
拍攝當日，平時口水多過茶的Van面對伊健立即變乖寶寶，更被隊友爆料Van「迫導演加戲」，Van立即解釋：「其實劇本一早寫好，我只係溫馨提示導演有呢場戲啫！」Van能夠近距離接觸偶像，拍攝前一晚特意做美容護膚，做面膜更打孖上，笑言：「這才襯得上偶像。」伊健聞言立刻醒他兩招說：「我初出道出鏡故意唔化妝，觀眾見到個個上鏡都咁靚，寧寧舍舍有一個唔化妝黑麻麻殘殘哋，咁先夠特別！」
偶像幫忙親自試位
Van每當埋位都異常緊張又姿整，遇上任何反光面都左照右照，在場工作人員為他鼓掌打氣，伊健見狀親自為他試位和睇playback，毫無架子令Van感動不已。
《時光歲月》是Van為伊健度身訂做，尤其歌詞加入了大量伊健的經典情歌歌詞，一聽就知道是「伊健專屬」，難得他竟然將情歌歌詞融合變成一首正能量滿瀉的勵志歌，而MV亦選在校園取景，Nowhere Boys 成員和伊健分別飾演教師和學生，鼓勵年輕人勇敢追夢和珍惜友誼。Van說：「最初一心為寫畀伊健獨唱，旋律和歌詞都度身訂做，威逼利誘其他兄弟讓我完成夢想。後來伊健提議合唱，這個消息是我今年最好生日禮物。」身邊的伊健說：「對我來說都係好有意義嘅禮物。」
歌名《時光歲月》由伊健命名，行動代號「Nowhere Boys along with 鄭伊麵」，伊健說：「呢首歌由佢哋寫音樂和填詞，啲歌詞好有趣，將我哋兩代人連埋一齊，大家都知我咩年紀，雖然我哋嘅年紀有啲距離，但理想和理念可以一樣，唔受年代或年紀限制，唔使分得咁清楚，音樂係可以一齊玩，我覺得呢首歌好適合一班人一齊唱，『夢想』就係呢首歌嘅理念。」