■「抗爭幣」被疑是新騙局。「黃絲」成日聲稱「藍絲」腦殘，但自己陣營先後俾「612人道支援基金」同「星火同盟」圈錢就圈到毫無反抗能力，近日又有個所謂「香港公民鏈」組織話要發行「抗爭幣」，聲稱「每一個『抗爭幣』都是由『對抗爭支持而產生』」，叫大家捐錢換幣，再去同樣認同「抗爭幣」嘅商戶度消費。唔少「黃絲」網民都睇唔明佢哋究竟想做乜，有網民直情留言話︰「已經感覺到伏味，到時肯定群魔亂舞......」
雖然「星火同盟」被揭發涉嫌洗黑錢、「612基金」成日都被指唔支援「抗爭者」，但「黃絲」為咗所謂嘅不割席，都一再包庇，甚至往往都聲稱係有人「插贓嫁禍」、「存心分化」佢哋。不過，事實上佢哋就似乎上一次當學一次乖，所以當「香港公民鏈」前日喺facebook開post宣佈，話搞咩「抗爭幣」同「國難士多」，有關消息被《立場新聞》post出嚟之後，大家嘅警覺性都高咗好多。
牽扯612星火賣周邊 「五金」鬧爆
呢個所謂「抗爭幣」，就係叫支持者捐錢俾指定組織，捐100蚊港幣就會喺個組織度收返100蚊「抗爭幣」，如果個組織冇幣俾人，就會啟動「發行機制」兌返相應「貨幣」出嚟，總之就係將真錢變代幣，然後大家又可以攞住啲代幣去「國難士多」或者認可商戶度買嘢咁話。目前嘅認可商戶竟然頭兩個就係「612基金」同「星火」，至於個「士多」目前主要賣「香港加油」商品。
其實講嚟講去，大家除咗覺得麻煩咗之外，都唔知有乜質實好處，而啲錢到底落邊個袋，大家都唔係好明，而「國難五金」就率先割席話︰「你老×臭×唔好成日拎我個名啦，唔×關我事呀×你老×！」「Yong Chan」亦揶揄「香港公民鏈」︰「為咗發『國難財』真係無所不用其極。」
「Mingfai Ma」就嘗試分析︰「黃色商品/服務提供者要用港幣買材料/出糧，但收咗『抗爭幣』唔知可以用嚟做乜。其實呢個coin（幣）功能類似『hkongs』（其中一間黃色網店）禮品卡，只係無野（嘢）backup（支撐），唔可換番（返）實體貨物或錢。」
批《立場》幫「騙局」賣廣告
「Billy Tang」話︰「已經感覺到伏味，到時肯定群魔亂舞......」「Lee Irice」亦話︰「其實要幫『手足』，『黃店』寧願直接請，都唔想搞呢類集資幣，因為呢類幣最後得益者一定係始創者，跟（根）本幫唔到真正有需要嘅人。」「Vicky Ma」勸大家︰「小心渾水摸魚之輩。」「Alan Kwan」斷定︰「騙徒手法，層出不窮。」
有人就認為時間「好巧合」。「白兵」指出︰「大家小心，虛擬貨幣唔易玩。......『星火』一比（俾）人凍結戶口就有『抗爭幣』？」「Darren Hon」直情嬲埋《立場》︰「鬼到×街，《立場》登埋d（啲）咁野（嘢）。」■香港文匯報記者 甘瑜
