■有人上傳疑似IAD的財政報告，前後3個月就使咗20幾萬，但全無分項。一場修例風波，圈錢嘅又點會只得嗰幾個以「支援抗爭」為名嘅基金吖。嗰個冇乜人知佢哋幾時成立、有啲咩人、做過乜嘢、代表邊個嘅所謂「香港大專學界國際事務代表團（IAD）」，今年10月31日喺facebook話已經眾籌到超過300萬，仲聲稱「日內向大家公佈財政報告」，但之後喺fb都冇見過佢哋份報告。不過，近日就有人將佢哋行極簡路線嘅財政報告掟上網，發現佢哋每個活動都係得一條大數，根本唔知佢哋用咗啲錢喺邊。
日前有自稱為港大學生嘅人向fb專頁「學民苦主大聯盟」投稿，狠批自己完全唔知「IAD」係點組成，更加唔知嗰個張崑陽之前係點代表港大去加入「IAD」，「想講佢真係零民意授權，我仲要特登查佢background（背景），原來佢以前係BuSu（浸大學生會）啲人，之後tran（轉）咗嚟hku讀。我同其他fd（朋友）一直覺得『iad』好怪，好似學聯翻版咁，仲要眾籌三百萬都冇講點用。」
個港大生話，IAD所謂嘅國際游說冇用，「搞到似係贊助佢哋歐美遊咁。」至於眾籌啲錢去咗邊，個港大生話自己搵到佢哋份財政報告，但就做得求其過中學生，「一個trip（外遊）一個數。我點×知佢哋有用（冇）偷咗啲錢啊？」
3個月燒廿幾萬 「豪遊」冇監管
睇返佢掟出嚟張財政報告截圖，搞個集會搞咗8.5萬，去台灣「游說」就用咗2.2萬，但去澳洲只係唔使9,000，仲有個雜項係5,000，但就冇講包咩，前後3個月就使咗20幾萬。
雖然個張崑陽已經退出IAD，但個港大生就認為︰「根本就係佢發現『iad』真面目開始俾人揭穿，想拍拍蘿友就走！彩就佢攞曬（晒），啲人仲讚佢知錯能改！」佢仲斷言，張崑陽第時會繼續用所謂國際影響力去騎劫學界，然後入政界做嘢，「佢呢個人根本就係學聯班人一手扶植，毫無民意授權。作為學生真心只係被代表啊×！」
除咗呢啲嘢，港大學生會嘅《學苑》之前都報道，IAD成立咗幾個月都冇完整憲章，學生會都監察唔到佢哋嘅發言，呢啲咪就係所謂嘅大專學界「代表團」囉。■香港文匯報記者 甘瑜