■有自稱是徐的姨仔狠批他消費女兒。 fb截圖所謂日久見人心，時間越耐，就越多「問題黃絲」浮面。廣告人兼作家徐俊文一直以自己個女嘅名「徐緣」做筆名，令人以為佢係好男人，呢段時間佢亦以「深黃」自居，仲帶頭吹雞叫廣告界罷工。不過，佢早前俾老婆踢爆兩度出軌，最近一次係偷食前港姐，令一眾「黃絲」都大鬧佢賤格。有連登「黃絲」亦開post話佢之前扮晒好人支持員工參與罷工，其實就暗地裡叫員工Home Office（在家工作），令「黃絲」深感被騙。潛水成個月嘅徐俊文前日終於出post回應出軌一事，結果俾人恥笑佢以前成日教人拆解「關公災難」，但就自己都拆唔掂。
用個女個名「徐緣」做筆名嘅徐俊文，早前俾老婆踢爆兩度出軌，第二次係偷食前港姐鍾溥敏，引起軒然大波。徐俊文一直潛水冇回應，但臭史就被越揭越多，有人就喺連登開post，話佢之前叫廣告界喺（去年）12月初罷工，但原來自己就叫啲員工Home Office默默工作，再寸埋佢「口講係深黃」，但事實上就不停接建制陣營嘅廣告嚟做。
安插媒體厚職 出晒面幫小三
喺出軌方面，亦都有唔少網民做偵探咁跟進。原來，徐俊文舊年創立咗個所謂《悶傳媒》，而小三鍾溥敏就係《悶傳媒》嘅「總編輯」嘞。有個叫「Gloria Son」嘅網民噚日仲喺《悶傳媒》個facebook專頁度留言，話徐俊文用公司名義每個月出3萬蚊畀鍾溥敏，變相佢合夥人都有份幫佢「出糧」畀情婦𠻹。幫個情婦幫到出晒面，又難怪老婆要用大踢爆手段清算個老公嘅。
嗰頭道歉洗底 轉頭同情婦飛
件事就咁沸騰咗成個月，徐俊文終於潛完水肯浮面，前日喺fb開post，一開頭話自己之前「沉默」係想「將事件對家人的影響減到最細」喎，然後先認錯話自己對老婆同個女「有虧欠」。轉個頭佢就繼續懶晒關心個女咁話唔想再影響到個女，所以同老婆「有共識」，未來唔會再用「徐緣」做筆名，改返用真名徐俊文，而自己亦都唔會再回應件事。
點知呢個公關回應，好快引起另一場公關災難，有人自稱係佢老婆個妹，留言鬧徐俊文人渣，直指佢由始至終都冇同老婆同埋個女道歉，仲要呢頭叫老婆畀時間佢諗清楚，轉頭就同情婦外遊，仲有埋機票證據𠻹。呢位姨仔仲鬧爆徐俊文唔好扮關心個女，踢爆阿老婆明明係要求佢刪咗個專頁，寸佢根本係唔捨得放棄用「徐緣」做專頁所得到嘅粉絲，根本仲係消費緊個女。不過，呢啲留言就似乎俾人刪咗。
網民「Morde Simon」亦鬧爆︰「你玩爛人地（哋）個名，然後同佢講：『俾（畀）返你啦我唔用啦』，你真係×街嚟㗎喎。佢以後因為你，一同人介紹自己，人地（哋）都會講『哦個×街個女』。」有人就寸佢︰「不如改名做『徐富』。」
部分網民覺得佢人品有問題，都好厚道咁冇過問佢家事，但就要求佢澄清返自己同建制陣營嘅利益關係，叫佢唔好再扮黃抽水。「李翰潔出少年」︰就話「佢不嬲都唔係深黃啦，自己號召罷工變Home Office就真係肉酸。」
網民批盲撐已成港歪風
不過，佢個專頁有9萬個like，都有人留言撐佢㗎。「熱狗」Billie Ng 就睇唔過眼話︰「賤格的作家，就有賤格的讀者。都渣男到咁的地步，正常人呢，保持沈（沉）默，不多踩幾腳，已算克制。但呢度竟然有咁多人留言支持佢，仲話欣賞佢，真心痴（黐）線。」「JC Louie」亦回覆話︰「徐生事件正好反映盲目支持已成香港新氣象！從近月香港政治事件更見一斑！」 ■香港文匯報記者 郭家好
