勇：「天屍」累小隊退場 和：謀帶風氣情緒勒索
泛暴派過去7個月成日話唔割席，對「勇武暴徒」嘅行為隻眼開隻眼閉，又要成日呃自己啲行為係警方臥底所為，於是又精神分裂地「捉鬼」，結果捉到啲「勇武暴徒」心灰意冷、不同「小隊」損兵折將，近日紛紛宣佈因為「黃絲」嘅捉鬼行動而退出黑暴運動。呢件事喺網上引起兩極反應，「勇武派」鬧爆嗰班「和理非捉鬼天屍」累死手足，「和理非」就鬧佢哋喺度帶風向打擊士氣，仲話冇人想知佢哋係咪要退出，呢啲咪真係「黃絲」所講嘅「將義士當Condom」囉。■香港文匯報記者 甘瑜
繼之前針對警察嘅所謂「屠龍小隊」被爆出因為捉鬼幾近滅團，陸續被警方拘捕後，近日又有多個「勇武小隊」先後宣佈要退出黑暴運動、暫停行動，或者解散，包括「仇士小隊」、「反狗特勤隊」同「火炬小隊」等。
鬧班冷氣軍師捉鬼唔使本
其中，「仇士小隊」話以前佢哋「行動」時都有人開遮幫佢哋掩護，但到舊年11月就有好多成員被捕；「特勤隊」就話佢哋精於「裝修」、襲警、搶犯等，但成日因為髮型俾人當係警察，啲所謂「手足」又唔肯聽前線「勇武」嘅指揮等，直言啲捉鬼行動令佢哋好大壓力；「火炬小隊」亦話佢哋「戴耳機，主動火魔，主動裝修等，都被人指控做鬼」，決定解散。
對於呢個情況，「勇武派」當然火都嚟，大鬧班冷氣軍師捉鬼唔使本，自己唔去衝，仲攞班「勇武手足」嚟較飛。中文大學「獨」講師劉正就喺facebook專頁「無神論者的巴別塔」寫長文狠批啲捉鬼言論，狠批啲人捉鬼捉到「手足」要「流亡」，但連對唔住都冇，仲為捉鬼辯護，「×你老×我地（哋）而（??）家講緊放核彈都唔割，而（𠵱）家早咗裝修幾個鐘就要比（俾）你班『和理天屍』割席兼篤灰？」
批打沉「勇武」令飯民重新主導
佢仲點名批評社民連前主席陶君行，因為對方話「勇武派企得出嚟就唔應該怕人捉鬼」，直斥有關言論無恥，「每次捉錯鬼，都足以令『義士』被點相、被拘捕，面對數以十年嘅監禁，仲唔×夠牙（呀）？」
劉正話，要人唔怕捉鬼「日後所有『捉鬼天屍』一律以叛徒作看待，『獅鳥（私了）』全面解禁，咁勇武就唔×驚你班『和理天屍』勒（嘞）！」佢仲踢爆，其實「和理非」根本係想打沉「勇武」，「令飯民大台重新主導運動」。
「港獨」組織「香港民族陣綫」亦爆粗鬧「捉鬼天屍」，「呢一隊（特勤隊）唔係鬼，人哋有幾個係學生（已FC，睇咗證件），未夠秤做曱甴呀。」
被冷嘲熱諷「你退關我咩事」
撐「勇武小隊」嘅言詞激烈，反對佢哋嘅言論同樣精彩。「激進」分子「肥蔡」蔡佩強噚日就喺fb冷嘲熱諷，叫佢哋收皮，「都係啲（嗰）句，冇人想知，你打又好退又好一概冇人想知，唔好好似傻×咁要人『Un goo goo（氹）』你，我可以100%同你哋講真係冇人會因為你嘅退出而自責，一個都唔會，捉鬼嘅一樣會捉鬼，打仗嘅一樣會打仗，一切如常。」
網民「連登博弈家」亦都喺網上討論區「連登」開post，話「你宣布（佈）退場，關我咩事」，質疑班人係為咗「光環」，話啲「捉鬼天屍」都係有警覺性啫，叫佢哋俾人懷疑係警察時，應該先諗自己做咗啲乜令人誤會，唔好以為「勇武」高級過「文宣手足」喎，最後仲叫佢哋「慳啲啦×頭皮」。
有網民亦附和，「Caar Laa」話︰「嗰啲退場情緒勒索，睇到周身唔舒服。」「Sugano Kento」反問︰「點解棄game要畀（俾）人鬧？老奉幫人擋子彈？鬧嗰啲真係不知羞恥。」有啲激進派就建議︰「捉鬼者一律視為藍絲，直接私了。」
呢啲狗咬狗、鬼打鬼，一般市民都係食下花生，但呢堆說話就證明咗一件事，話警察臥底放火、破壞、打人，其實都係班暴徒所為，同警察無關囉。