■黃翠如笑言好多人鍾意唐詩詠，不用擔心她嫁不出。香港文匯報訊 （記者 梁靜儀）唐詩詠日前在社交平台預告七月份將會送一份神秘禮物給亡母，惹來閃婚猜測，好姊妹黃翠如日前代詩詠否認婚訊，並指報道得啖笑，當然都希望她有幸福的事宣佈。
翠如昨日回電視城為新劇《七公主》進行拍攝，休息了半年的她笑言期間做師奶之外，還做了很多瘋狂的事，與老公蕭正楠分頭撲米及廁紙，她笑說：「試過有一日我接到老公電話，話見到超市有米賣，我即刻着住睡衣出去撲，但都買唔到，後來陸永老婆識得朋友賣米，幫我哋買咗25公斤日本珍珠米，仲要只係二百幾蚊，不過經歷咗嗰次之後，大家都好珍惜食物。」
相隔半年再拍劇，問到翠如可習慣？她表示開工第一日拍《七公主》已經要同高海寧拍攝一場激烈嗌交戲，還要在炎熱天氣下着西裝拍外景，希望不會中暑，她說：「劇入面我要經常着成套西裝同埋高踭鞋，試過着住西裝拍外景搞到成件褸濕晒，要吹乾先可以再繼續拍攝，同埋我又要着尖頭兼斗零踭高踭鞋，我本身有扁平足，雖然喺屋企都有練習過，但去到外面情況又唔同，唔使埋位或者影唔到全身嘅時候，都會要求監製畀我着平底鞋，女人嘅扁平足男人真係唔會明白。」
談到她日前與好姊妹唐詩詠在酒店慶祝生日，還穿上浴袍切蛋糕，她表示因前後陪對方切了七個生日蛋糕，所以詩詠請她做Spa。問到詩詠是否即將有喜訊公佈？翠如就否認說：「我同佢睇咗報道之後都係得啖笑，大家唔好係唔係都拉落去結婚，個過程太快喇，我當然都希望佢有幸福嘅事宣佈，不過佢將要連開三套劇，暫時都未必有時間，佢𠵱家身邊嘅『男人』得我一個，（介紹男人俾佢？）佢邊有時間，累咗個男人，等佢拍完三套劇會催迫佢，大家唔使擔心，佢好多人鍾意。」