「黃色經濟圈」真係好驚人，買壹傳媒（0282）股票買到蒸發咗一班「手足」嘅私己錢。噚日網上繼續遍地「手足」嘅哀嚎，有人話自己輸咗成15萬輸到手震，唔知點同女友家人交代，但有「黃色經濟專家」就勸班苦主繼續持股，一日未賣一日都唔當輸，同賭枱嗰句「有賭未為輸」有得揮；有人話當係捐咗畀肥佬黎（壹傳媒創辦人黎智英），部分「同路人」都睇唔過眼班腦殘「黃絲」，狠批佢哋「戇X」，「你話D（啲）錢去政府同港交所到（度）仲合理少少。」
「15萬旅行基金一鋪清袋」
到底「黃絲」今鋪有幾損手爛腳？實質金額暫時統計唔到，但「連登」討論區嘅「肥佬黎282又爆跌」噚日已經開到第7個新post，苦主「如果真的太好」亦留言話︰「15萬既（嘅）旅行基金一鋪清袋，宜（𠵱）家唔知點同女朋友交代，琴（噚）朝1.6入，宜（𠵱）家手都震埋。」「冰瞇魁隆」安慰佢︰「15萬當換自由之軀。」有人就揶揄︰「『自由之軀』係咪講緊女朋友？」「青空遙香」亦話︰「你女朋友值得更好，無謂累人。」
不過，苦主當然唔止佢一個，佢哋漆黑嘅世界中仲有無數黃色燈火互相輝映，「再待你好也無回報」亦留言︰「我自己都無左（咗）七萬。」「如果真的太好」亦後悔表示︰「今次之後唔再信股票會賺錢。」「進擊的窮人」直情怪罪肥佬黎鬧佢係「老千」。
「輸錢當撐蘋果」狂被嘲諷
呢班「黃絲」唔識嘢真係唔係扮嗰喎，「涼拌粉皮」竟然話︰「其實輸左（咗）啲錢都係去左（咗）黎智英度，咪當撑（撐）下蘋果。」唔少「同路人」都睇唔過眼班腦殘，留言狠批佢「戇X」、「咁都講得出」，「ILmae」亦模仿肥佬黎心聲留言︰「黎智英︰WTX，一蚊都無賺過你，你話D（啲）錢去政府同港交所到（度）仲合理少少！」
雖然係「同路人」，但踐踏起同道嚟大家都毫不留情，有人留言話佢哋衰貪心，純粹想炒股，輸咗係抵死。「F_Valverde」亦話︰「當拎錢交下學費，又話支持肥佬黎輸曬（晒）都唔怕，宜（𠵱）家就揼晒X。」有網民就製圖揶揄︰「肥佬黎，你可唔可以俾人拉多次？升返$1.96救救『手足』。」 ■香港文匯報記者 甘瑜
