嗰頭壹傳媒股價暴跌，呢頭《蘋果日報》縮紙，早兩日話《蘋果》熱賣加印到55萬份，噚日就變返印13.8萬份，短短兩日蒸發41萬份支持真係話咁易。全國政協副主席梁振英（CY）喺 facebook 出post 揶揄《蘋果》自暴其醜，網民亦反問︰「蘋果你點可以咁，你點可以用減少印量去嘲笑自己嘅支持者？」
「黃絲」成日話自己有200萬人，但就連幾十萬份報紙都消化唔晒，前日民主黨嘅羅健熙已經喺fb出post，轉發南區《蘋果》滯銷嘅消息，反問大家「一日就無以為繼啦」，CY已經出post揶揄佢︰「自欺欺人的蘋果日報、天真的羅健熙。」
CY噚日再喺fb出post話，蘋果日前仲係威係勢話市民撐、排長龍買，結果加印報紙就擺到一街都係，「免費送都冇人要，夜晚十點半重（仲）有人喺街派。今（昨）日終於縮咗三分二，只印13萬8千份。一句到尾，就是自暴其醜！」
身為「熱狗」嘅「阿柱」亦喺fb發文揶揄︰「頭先去OK，見到地下冇蘋果，開心，支持者今日又掃返了，但原來係放咗上架。今日印數138,000份，蘋果你點可以咁，你點可以用減少印量去嘲笑自己嘅支持者？」「Hoi Fung So」就看透世事咁話︰「從來只有打咭（卡）佬，邊有支持者？」 ■香港文匯報記者 甘瑜