■「珍惜群組」成員到醫管局請願，促革除余慧明職務。攬炒派「醫管局員工陣線」主席余慧明早前話唔建議市民參與普及社區檢測計劃，更以各種理由質疑政府無視市民嘅健康安全，又聲稱做完測試嘅隱形病人有可能傳播病毒畀其他做檢測嘅市民。全國政協副主席梁振英噚日就喺facebook度發帖揶揄，余慧明有「特異功能」，可以用眼睇到人體內外有冇丁點新冠病毒，並呼籲：「余主席可以擺街站，為市民提供另類檢測服務。」
余亂講做檢測易中招
被冠上「反智」頭銜嘅余慧明日前聲稱，隱形病人做完測試後有陰性結果唔代表等於健康（講緊「假陰性」），所以呢啲隱形病人會如常搭車返工同食飯，更有可能喺採樣時傳播病毒，所以喺余慧明眼中，如果你做了檢測就好大機會會被感染喎。
眼見余慧明謬論連篇，梁振英以「余慧明有特異功能」為標籤，幻想余慧明堅決不做檢測嘅一日，「今早起床後，用手摸摸額頭，測得體溫是36.2度，再照照衣櫃的全身鏡，確定體外體內沒有丁點新冠病毒，如常逼電梯逼地鐵上班。」諷刺余慧明有特異功能，可以用肉眼睇到新冠病毒，做到檢測，並呼籲「余主席可以擺街站，為市民提供另類檢測服務。」
網民對梁振英寸余慧明扮晒嘢叫人唔做檢測一事感到大快人心。「Andy Ho」笑言：「魚為明（余慧明）記得在家中各處都應該擺放和長開紫外光燈鏡用作殺菌之用。」「陳澤潮」揶揄：「過去有好多特異功能嘅神人，可以令匙羹彎曲、可以隔空取物、可以越洋治病。余慧明可能是那神人的弟子。」工聯會立法會議員郭偉强就批評余慧明「毒上腦」，「Scan（掃描）病毒就唔知，毒上腦就一眼睇得出。」
網民促醫局罰攬炒醫護
「Tina Mo」笑言呢啲服務留返畀「手足」啦，「佢嘅『另類服務』只適合佢啲『手足』！」；「姚德忠」叫醫管局做嘢，「建議醫管局立即審查此女醫護知識」；「羅玉玲」質疑無人管下攬炒派醫護，「對搞亂社會秩序，破壞安寧，危言慫（聳）聽的醫護，為什麽不懲罰他／她們呢？」「Wan Yee」促醫管局回應，「真係好唔明！醫管局是以甚（什）麼理由，要容忍這些與政府政策對着幹的員工？醫管局可否回應一下？」
「珍惜」要求革除余職務
同日，「珍惜群組」到醫管局總部請願，聲討余慧明「濫竽充數扮專業，煽動反普檢草菅人命」的政治無賴言行，要求革除余慧明醫管局的職務，解除香港市民求醫威脅。「珍惜群組」發言人李璧而認為，新冠肺炎疫情來勢洶洶，但余慧明等醫管局員工卻落井下石，不顧市民身體健康，拒絕內地人員來港援助、反對「普及社區檢測」計劃，香港市民感到十分憂心彷徨，指醫管局不能包庇、縱容以政治凌駕專業的員工，必須革除其職務。 ■香港文匯報記者 郭家好
