■河童借踎監暴徒大搞政治宣傳，結果迫懲教依法拒絕收月餅。咁多「手足」喺監獄過緊「精彩人生」，攬炒派近期都零舍關注囚友情況。天主教教區榮休主教陳日君日前話要籌款買月餅送畀「手足」，再加上曾經坐監嘅前「香港眾志」秘書長黃之鋒（河童）同埋立法會社會福利界議員邵家臻都幫手宣傳話要送月餅畀在囚「手足」，咁明目張膽挑起政治議題，當然就俾懲教處拒絕咗啦。陳日君就話自己年年都送月餅畀囚友，今年唔同嘅係有黃之鋒、邵家臻宣傳，仲話「愛心捐月餅，贈鐵窗手足」係黃之鋒所設計，今鋪黃之鋒佢哋真係中晒箭嘞。陳日君日前喺網上發起籌款，請有心人捐錢畀佢買月餅送畀囚友，當時都有啲人質疑點解唔直接捐月餅、點解支票抬頭要寫陳日君，不過𠵱家咩都唔使質疑啦，因為懲教署認為個活動有政治宣傳而拒絕咗。
網民質問：耶穌教你把人分顏色？
陳日君噚日就喺facebook度話，自己年年都有送月餅，「不同的，是今年多了朋友如黃之鋒、邵家臻在他們的facebook中分享這活動」，又話「愛心捐月餅，贈鐵窗手足」係黃之鋒設計嘅語句，仲話「也許，他曾經入獄，對於有相似背景的兄弟姊妹會分外關顧憐惜」喎。
不過，囚友冇月餅食其實又唔完全係黃之鋒班人嘅責任，因為陳日君自己都喺個宣傳度話舊年中秋節有「黃色人」上獅子山，今年中秋節係國慶日，「藍色人」會雙重慶祝，而鐵窗後「有些手足我們或許會特別掛念」喎，而宣傳海報入面嘅妠N梗係着黃色衫啦。個政治意味仲重過黃之鋒佢哋，但陳日君就話自己嘅主題係「無論是誰，月亮也會祝福各人」喎，真係唔知點理解嘞。
對今次送月餅無功而返，唔少網民一啲都唔同情佢哋。「Martin Li」就質問陳日君︰「耶穌教你把人分顏色架（㗎）？」「Mei Mei」話︰「做活動之前都問吓對方接唔接受先做，係基本。」「Amy Lau」仲絕︰「中國人的節日關佢地（哋）咩事？佢地（哋）都唔認中國人。」 ■香港文匯報記者 甘瑜