有人話，講大話叻係天生嘅，因為就算每個人都識得講大話，都唔代表每個人都有一塊面不改容嘅厚面皮。講到厚面皮，攬炒派元朗區議員伍健偉近日就嚟一次完美示範，喺上個禮拜同你講要同立法會議員何君堯鬥多facebook專頁讚好，輸咗就辭去議席，永不參政，之後怕輸已改口話「不可能單單為了一個讚好而賭上整個政治生涯。」噚日結果出爐，呃完咁多手足含淚讚好，結果都仲係輸過萬，佢仲要死撐唔認衰，唔少網民都話：「你唔辭職，影衰曬（晒）我哋啲手足俾人笑，真係唔知醜到一個點！」伍健偉上周拎自己個議席嚟呃讚好，其實搞到自己畀同路人圍插佢情緒勒索，連日嚟鬧到佢狗血淋頭，但就確實令自己進賬咗唔少讚好，專頁讚好數由唔過萬升到14.9萬，但若要同何君堯專頁嘅16.7萬個讚好比，仲係輸足一條街。佢噚日見輸仲喺facebook發近兩千字長帖解釋「點解要呃Like（讚好）？」不過，呢頭呃完人，轉頭想人信，都真係幾難！
唔少網民話就算帖長文都於事無補，鬧伍健偉已經冇晒信用。網民「Wong Chris」咁講：「講咁×多廢話......區已完真係唔知醜到一個點，下次就唔好再扮勁啦，你改名叫『伍找數』、『伍認帳（賬）』啦！」「手足」「Edmond Kl」都話：「誠信破產！講過嘅野（嘢）可以完全唔認數，講到尾都係唔捨得5萬人工，同泛民冇分別，都係死政棍！」「Dexter Li」就話：「講咁多，兩個字講曬（晒）『淆底』！」
「Carl Tsoi」就幫伍健偉回憶返佢對手足嘅承諾：「喂，唔好當冇件事喎！係男人『講得出，就要做！』輸咗比（畀）何議員從此唔參政、做港豬，做乜仲不停喺度散播政治謠言？」
同路人「Mayfly Hypatia」就話伍健偉從政咁兒戲：「有冇諗過個（嗰）日比（俾）你用情緒勒索個4千幾個投你的（嘅）選民，區議員一直都應該首要注重區內民生的改善......但係你咁用like（讚好）多唔過何君堯就辭職，將嘉湖北選民對你嘅授權去賭博......點解一個民意投（授）權嘅區議員可以咁兒戲對個議席，真係好小學雞！唉，無言！」
網民：攬炒派冇口齒意料中事
有網民就話攬炒派冇口齒其實係意料中事。「陳士強」話：「過去一年黑暴大話連篇，都預咗你會走數。面係人比（畀），架係自己丟，×咗成年，仲未×夠！」 「Jackson Chan」就同「手足」講：「Thanks for "Unlike" reminder（記得取消讚好）！」 ■香港文匯報記者 黃書蘭