■尹兆堅日前喺《蘋果日報》發表評論文章，表明他想「留守議會」。尹兆堅fb截圖傳統「飯民」「留守議會」手法層出不窮，鴿黨（民主黨）早前先係話搞咩民調，稱以民意嚟決定佢哋嘅去留，但又遲遲唔公布細節詳情，得個拖字訣。鴿黨副主席尹兆堅日前喺《蘋果日報》出嘅評論都寫到明「辭職於事無補，反而是不負責任」，仲拉埋台灣落水，唔怪得「抗爭派」嘅羅庭輝都鬧鴿黨：「你哋留任什麼都不會帶來的......」叫鴿黨唔好再喺度扮晒嘢。
尹兆堅日前以「以台為師 港泛民勿棄議會戰線」為題喺《蘋果》發表評論文章，內容講到有民間聲音要求包括鴿黨在內嘅全體攬炒派議員「集體總辭」，藉以「杯葛議會，並引起國際輿論的關注」。
不過佢隨即口風一轉，突然扮晒憂心忡忡咁話擔憂「總辭」解決唔到問題，驚貿然放棄議席以後唔知憑乜身份為民喉舌，「如何回應要求堅守議會的市民聲音。」又驚政府會永久取消參與「總辭」政黨嘅參選資格，令佢哋無得阻「惡法」，「筆者反倒認為，此時更應該倡議的是堅守議會，守住現有的（嘅）席次，而非輕易放棄這條『議會戰線』！」講嚟講去都係嗰句：「佢想留囉！」
更離譜嘅係，尹兆堅仲要拉埋台灣落水，話咩台灣嘅「抗爭之路」好值得參考，「你們嘅經驗也告訴我們，『國際戰線』、『街頭戰線』和『議會戰線』三線並行的重要性。」因此鴿黨又多一個藉口「留守」啦！
尹兆堅嘅種種藉口，加上早前林卓廷聲稱：「撤出『議會戰線』可能導致嚴重、不可逆轉的後果。」阻唔到「惡法」云云，令羅庭輝都忍唔住喺fb開post鬧鴿黨，叫佢哋唔好再扮嘢。
北區區議會主席羅庭德嘅哥哥羅庭輝，就喺fb好直接咁話，如果佢哋走咗咪仲好，因為佢哋本身都無乜用，「又係你哋話撐攬炒嘅，何況有無你哋都照過架（㗎）啦，扮咩啫～......不要說你阻止到什麼，試着住（說）有你哋會帶來甚（什）麼。比如話，留任議會，我哋可以通過每月派一皮。嗱，咁就中point啦～不過你哋唔會咁講，因為你哋留任甚（什）麼都不會帶來的。」
網民諷鴿黨「賴死唔走」
連網民都笑鴿黨面皮厚，明明輸咗仲死撐。「Shine Sun」鬧：「面皮厚過地殼！瀨（賴）死唔走！」「Bessie Leung」揶揄：「民調輸了還死撐，十萬月薪怎捨得，自圓其說確係得。」「Alfred Pak」就叫鴿黨不如認愛錢，「坦白承認要份糧開飯，唔好再講咩『議會戰線』啦......你地仲做到咩？」「Pak Kin Cheung」問佢哋係社會上有乜用，「為咗五百幾萬一年，梗係唔可以放棄議會個位啦！你唔係議員的話，係（喺）呢個社會上仲有咩用途呢？」「張明浩」攞事實出嚟講，「成日關鍵缺席仲好意思講自己『議會抗爭』，笑死！」 ■香港文匯報記者 郭家好
