■黃嘉浩質疑陳旭明收授權票是別有用心。 黃嘉浩fb截圖鴿黨（民主黨）嘅衰嘢真係日日新鮮，最近又被人踢爆多一單。曾參選區議員嘅攬炒派黃嘉浩日前喺facebook度開帖，鬧爆鴿黨北區區議員陳旭明，話見到近兩日法團同陳旭明突然好勤力收授權票，加上全邨banner加通告板都全力宣揚「授權畀我」，普通邨民一睇以為佢講緊石油氣嘅投票，點知當日業主立案法團嘅會議議程頭七項都係講緊法團改選，最後兩項先係關石油氣事。所以，陳旭明呢個收授權票嘅操作真係好難唔令人懷疑佢係為咗確保法團坐穩。
黃嘉浩同陳旭明已經積怨已久，雙方喺2015年為4,700萬元更換全邨水管工程就鬥個你死我活。但估唔到，今年陳旭明又被黃嘉浩踢爆，稱佢表面上收授權票係為咗「避免聚集」，幫邨民喺揀石油氣供應商一事上投票，但其實當日個議程頭七項都係講緊法團改選，最後兩項先係關石油氣事，「因為只要夠票就能夠決定所有關於條邨嘅事，包括揀邊間管理公司、揀提供服務嘅公司、揀最重要嘅邨代表──法團主席及成員......」
佢又解釋，法團嘅用處可以批准全邨內外範圍掛政客banner，「加埋成個管理公司&法團幫埋議員做地區工作，陳仔日日喺屋企??住袋6萬幾蚊一個月人工都咪話唔勵志」，所以認為陳旭明擺到明別有用心，「反正佢哋都睇死祥華邨無人同佢哋爭」，又聲稱佢唔係搞緊「分化」，只係呢班政棍為利益同為議席而扮晒「同路人」喎。
議員法團管理公司圍威喂
好多係街坊嘅網民留言話唔知呢件事，「Ivy Tam」質問：「死白鴿，收咁多授權票拎黎（嚟）食咩！」黃嘉浩笑言：「又真係食得，為咗確保法團坐穩，係要加大力咁收票。」「Ka Yan Tsang」就直言「我都覺得好奇怪」，黃嘉浩解釋：「未必個個街坊都知道法團同議員係同一堆人，好處係做嘢似乎直接好多，壞處係議員、法團甚至管理公司會有好多利益關係，錯綜複雜，所以見其他區正常兩者因利益衝突係唔應該行得太埋。」
「Kim Joog Kin」質疑「點解一個議員可以叫人俾（畀）授權票然後選當佢業委會？」；「Yoshio Ng」諷刺佢哋「法團議員同氣連枝，監察？哈！」；「ienn Leung」道出鴿黨真面目，「民主黨來來去去都淨係識呃錢」。黃嘉浩就加多句，「最緊要適時出post......同埋叫口號！」■香港文匯報記者 郭家好