啲攬炒派明明係「走佬」，但成日都要標榜自己打緊「國際戰線」，唔少人都睇通睇透，連被稱為「港獨理論家」嘅練乙錚，日前亦發表長文潑佢哋冷水，話打所謂「國際戰線」根本係錯誤，估計最終都一事無成，又覺得啲「人權說帖」講爛晒，唔會再有乜效果，講到明所謂嘅游說「成功」都係大國利益嘅算計，人哋都要為自己嘅經濟利益，冇可能係咁以所謂「人權武器」同中國周旋到底喎。
最後糊里糊塗地夠鐘消失
練乙錚篇文名為「給海外翼朋友淋六桶冷水」，從「人權說帖不是符咒」「流亡組織十居其九泡沫化」「流亡團體多是道德糞坑」「勇武無法適應流亡日常」等6方面證明香港所謂嘅「海外流亡者」最終多係會一事無成，等啲「同路人」清醒啲喎。
練乙錚話，所謂「海外陣線」一窩蜂搞「國際游說」係錯誤，「因為未弄清楚民主國家政客要對投票人負責，包括要保障他們的經濟利益，因此不可能以『人權』為武器與中國周旋到底。」佢估計喺西方很多幾十年一事無成的「流亡運動」，都係糊里糊塗「抗爭」幾十年，最後又糊里糊塗地夠鐘消失。
由香港「走佬」派組成嘅「國際戰線」成日將乜「人權」擺喺口度，練乙錚就話呢個說辭之後難再有突破，「他們要對自己的國民負責，包括在經濟方面負責，不可能無限度付代價替你打『人權』仗。」
佢仲直言中央同香港政府都唔會因為佢哋將「人權民主價值寫在說帖上」而「讓步」，而「游說有效」純粹係因為「赤裸裸的大國利益關係算計，游說的內涵不涉絲毫道義」。
練乙錚又話所謂「流亡運動」喺海外冇「公民社會」監督，好大可能因為「爭大台」而「打個半死」，啲團體更加可能出現好多問題，包括派系矛盾、資源爭奪等，而呢啲都仲係對「尚未喪失革命鬥志和初心的流亡團體」而言，嗰啲「喪失了鬥志、徒具虛名不事生產而以欺騙所在地政府和NGO津貼度日的那些團體，當然就更不堪。」
「流亡者」頂唔順寧送頭回流
好多所謂「流亡者」口就喊得響，而本質上根本經唔起生活嘅磨煉，練乙錚話：「2019離港的那批次當中，就有不少如下事例：『流亡者』到了目的國，人家慷慨接收，居留手續和基本生計都給苦心安排好，但因為『流亡者』飲食不習慣，於是沒多久就回流，寧願送頭。」
佢覺得??家真係有「臥薪嘗膽」意志嘅年輕「手足」「其實很少很少，少到接近零。」佢又話啲較年輕嘅香港移民關注嘅係當地社會同生活，就算喺香港出生同埋返過學嘅年輕移民，也好快淡忘香港事務，支持香港「民主」嘅意識薄弱得幾乎可說沒有。
網民「CDC」就覺得：「國際線不嬲係TRUMP恩賜下先會發生，真係香港人把口叻咩。」「Lau Sing Tony」話：「唔好講話『流亡海外』啦，就算揸正牌移民海外的，到了第二代已經差不多不會講『廣東話』了，所以『幾十年』就消亡是很正路的預測，又真係駁唔到練sir。」
不過都總有人唔想醒，「Chung Karence」就鬧：「練某，我以前也曾讀你在各報紙上發表的文章。不客氣地說，你這六桶水全無新意，......再潑冷水，傷口灑盬（鹽）又何必呢？」仲懷疑佢「是否因某些原因，你對香港這埸（場）『民主運動』的立場已變」喎。 ■香港文匯報記者 文根茂