●貨車車頂僭建晒圍欄大聲公、海報等布置。 政治大嬸判fb專頁截圖「民間人權陣線」日前喺荔枝角收押所舉行所謂「釋放政治犯」車巡行動，「支聯會」李卓人、「民陣」召集人陳皓桓同中西區區議員葉錦龍，齊齊企喺貨車車頂上嗌咪，但就俾人質疑架車車頂僭建咗圍欄，屬於非法改裝車輛，要求運輸署盡快做嘢。
車頂僭建圍欄擺大聲公
係人都知道改裝車輛係違法行為，但佢哋竟然夠膽罔顧道路安全，將架貨車改到離晒譜。由fb專頁「政治大嬸判」發帖嘅相可以睇到，3人所處嘅貨車車頂僭建晒圍欄，仲加埋大聲公、海報等布置。睇返「民陣」自己上載啲相，似乎都見唔到佢哋架車嘅「全相」，唔通佢哋自己都知身有屎？
一眾網民見到佢哋將架車改裝到咁離譜，個個都鬧爆呀！「Leung Teddy」話：「告番（返）幾張告票先，以我小市民嘅理解最少有非法改裝車輛、危險駕駛、冇扣安全帶、冇第三保。」「Alice Wong」就好激氣咁話：「拉人拖車啦唔該！搞亂社會秩序嘅敗類，咪又喺（係）為左（咗）錢，眾籌呀！課金呀！」「pang chan」亦話：「警方點解唔告佢非法改裝車輛？」亦有人揶揄佢哋，久唔久出嚟刷存在感，咪又係想氹人捐錢、搞眾籌。
唔理佢哋目的係咩，整架咁嘅車出嚟危害道路安全就係唔啱！提提大家喇，為有效遏止違規改裝車輛，維護路面行車安全，記得善用 1823 舉報，又或者填妥「有缺點車輛舉報表格」，一齊打擊非法分子。
■香港文匯報記者 倪思言