好鄰舍北區教會嘅醜事真係愈揭愈有，除咗早前教會同員工互相割席，令到教會員工所剩無幾之外，最近教會又被踢爆拒絕向員工及傳媒交代所得捐款去向，更加有教會內部人員直指「香港人真係唔睇字」，暗示一班「黃絲」淨係識得「盲捐」。
身為黃圈「自己人」嘅《蘋果日報》報道，佢哋喺舊年11月初就向教會傳道人陳凱興查詢教會賬目問題，但陳凱興就一直設法拖延，後尾直情無埋影。及後，有個自稱教會代表嘅人反反覆覆咁話會作回應，但拖拖吓一樣無咗件事。
據知，陳凱興除咗拒絕同記者交代，更拒絕同教會員工交代。《蘋果》話取得教會早前舉行員工大會時嘅錄音，講到捐款問題，當中有人言辭尖銳話「香港人係真係唔睇字嘅」。唔知一班「黃絲」知道教會咁樣形容佢哋，一堆玻璃心會唔會瞬間裂晒呢？
教會反駁《蘋果》 批幹事踢爆佢
被《蘋果》踢爆賬目混亂後，教會隨即發聲明稱，賬目一事已進入司法程序，目前不宜作出過多回應。同時又話自己並非如報章指「逃避不回」。教會唔單止一一反駁《蘋果》新聞呀，最後仲要講句「行在光明中的人，總要光明磊落」，批評一班青年幹事踢爆佢哋嘅所作所為。
網民「五毛pr狗有限公司」睇完成件事就留言話「黃色水魚圈」，有網民仲激動咁回應：「唉， 多得呢啲××又呃又偷又食，之後冚×富貴大×把錢走去外國，我哋就畀（俾）藍屍（絲）笑到做『黄色水魚圈』，天理何在！」「11111111D」就批評陳凱興話「臨尾仲要開個patreon呃多筆，罷（擺）明幾好揾（搵）喎」。
其實「黃圈」成日都搞眾籌，但最後就逐單逐單俾人踢爆涉及詐騙或者洗黑錢，呢個所謂嘅「黃色經濟圈」認真羞家囉。
■香港文匯報記者 倪思言