■毛婆想轉載返篇澄清新聞當冇事，但俾人鬧佢道歉都仲搵藉口叫人原諒。 毛孟靜 fb截圖元朗食肆被屈賣狗肉，身為元朗區議員嘅民主黨鄺神（鄺俊宇）屈完人都唔道歉，唔知係咪見鄺神俾人鬧得太慘，「香港本土」立法會議員毛婆（毛孟靜）噚晚就喺facebook，自動波為自己嘅播謠行為道歉，但同時要店主「理解」佢哋點解係「驚弓之鳥」喎。道歉仲附帶藉口，當然又係俾人鬧餐懵啦！唔少網民都喺伭b留言鬧爆︰「幾好笑，你要做驚弓之鳥，就可以胡亂作出無根據嘅指控，搞到人地（哋）損失左（咗）生意同商譽；然後仲要人去理解點解你要做驚弓之鳥？無賴之中你都算係極品。」
「做多咗」被網民鬧爆
當人人都鬧爆鄺神深潛唔道歉、幾乎冇人留意到其實毛婆喺謠言四起嘅時候，其實亦都幫手喺facebook轉載過「狗肉論」。不過，毛婆前晚留意到人哋證實咗真係賣羊肉後，都主動出post認衰，貼返澄清新聞，再加一大串hashtag（標籤）話「真相大白」、「要向店主說對不起」、「希望他也理解為什麼我們都是驚弓之鳥 」。
其實只係講前兩句，咪可能冇事囉，要人理解你係「驚弓之鳥」，咁就做多咗啦。「Cordelia Tai」就直言︰「驚弓之鳥用得好差！道歉就道歉不要找任何藉口。」「Aiden Chan」鬧爆話︰「你屈完人其實係咪應該要賠償返佢嘅損失呢？你驚弓之鳥你自己事。無料證明人賣狗肉就向公眾宣佈佢賣狗肉，已經唔係驚弓之鳥，而係含血噴人囉！身為議員，未求證就屈人，屈完人仲話『對唔住，原諒我哋驚弓之鳥』。」
fb專頁「得罪講句」就tag（標註）埋毛婆話︰「我完全理解點解你地（哋）係驚弓之鳥，因為炒作搏（博）出位囉。人地（哋）少左（咗）生意，你幾時賠番（返）錢比（畀）人？」
「Keyman Hor」就叫毛婆︰「建議你好好咁對人道歉之餘，去睇下（吓）有咩幫到人翻身！知唔知一盤養起頭家既（嘅）生意有幾難？知唔知窮係咩感受？」「Wong Ka Man」亦批評︰「為何真相未明，就進行網絡欺凌？你信口雌黃容易，受害人卻眾手所指，百詞莫辯，處境你有想過嗎？」
面對呢種行「動保」路線嘅政客，「Edmünd LSiu」就話︰「唔知幾時開始，香港越來越多尊重動物嘅人，但尊重人嘅人反而越來越少......」「Henry Lee」則無奈留言︰「唔好搞到外間對愛動物人士有誤解啦，以為我地（哋）個個關心動物都係痴線，郁d（啲）就話人殺狗，唉......」
毛婆當然冇再理大家對佢嘅討伐，喺fb貼下螳螂、貼下施政報告致謝議案，咁個道歉post咪慢慢沉底囉。不過呢，好多網民容忍反對派嘅底線已經越放越低㗎啦，「Sean Lam」就話︰「起碼有句對唔住，好過一眾潛哂（晒）水既（嘅）。」講緊邊個？再講就長氣啦。 ■香港文匯報記者 甘瑜