■法國佬踢爆「熱狗」都有人老屈小店。「Pierre Cheung」 fb截圖「指羊為狗」令反對派一眾「跟車太貼」嘅政客集體炒車，有人道歉、有人深潛，亦有人出嚟抽水。「熱狗」（「熱血公民」）立法會議員蟲泰（鄭松泰）噚日就煞有介事咁喺facebook出文，話「賣狗肉」一事一開始都有人搵佢求助，但佢就話自己唔想「民粹」，想了解完係咪確實先決定使唔使跟進，真係一巴兩巴咁車落民主黨鄺神（鄺俊宇）同「香港本土」毛孟靜度咁喎。不過，有前「熱狗」成員就踢爆︰「你地（哋）『熱血公民』水泥隊Becky Mok有份老屈文樂賣狗肉，到而（𠵱）家都仲係（喺）人地（哋）page（專頁）度死撐繼續老屈啊！鄭松泰主席！」呢鋪真係，笑什麼，你也是抽水抽着火水。
蟲泰噚日喺fb出文，一開始就話︰「去年今日，有網媒記者問我，我認不認同『熱普城』成日鬧人、『×票』，得失很多選民，所以導致『全民制憲運動』失利？」唔睇落去真係唔知佢想講乜，原來佢想順手翻案，話自己堅持己見，不流於「民粹」，仲用咗狗肉一事做例子𠻹。
佢話，自己冇貿然跟進，係因為佢唔相信「單憑一張圖、幾隻字」，大家就識分羊定狗，仲有人哋係小生意，如果要用權力向有關部門施壓，就要小心禍及無辜喎。佢仲委屈地話，自己咁樣堅持，一開始仲俾人鬧，但佢都唔會去「迎合大眾的水平和口味」。
蟲泰再踩多幾腳鄺神、毛婆之流話︰「點解？因為我要面。我絕不能接受自己老屈完小商販，然後分享該澄清新聞扮無事，甚至去幫襯了事。」然後結論就係「×票」其實就係「學習如何講道理」啦。
唔知佢講咗去邊？唔緊要，因為網民都掛住鬧佢冇理到。「Roy Tsang」就引用蟲泰金句話︰「無計啦，大眾係白痴㗎嘛，邊有『熱血公民』咁聰明。」不過個留言之後就唔見咗。「Jeffrey Yeung」則表示︰「×你蟲泰，支持你咪一×樣白痴，你有×資格話人吖！」
最絕係前「熱狗」、外號「法國佬」嘅張珈衍玩踢爆話，「熱狗」其實都有人老屈小店，仲笑佢︰「好學唔學學黃洋達（熱狗前頭目），放完狗咬人就扮唔關自己事，扮中立，×你老母啦......你地（哋）『熱血公民』有人老屈小店賣狗肉呀！你理唔理呀？駛（使）唔駛（使）道歉呀？」道歉就暫時冇啦，但法國佬呢個post就俾人投訴到消失囉。 ■香港文匯報記者 甘瑜