■「一個人」暗讚自己成功開拓「藍海」，被狠批踩低其他行家。 fb圖片有乜嘢花生可以食足成個禮拜？一係就防腐劑夠勁，一係就長炒長有夠晒香脆！而靠畫火柴人抽政治水起朵嘅「一個人」單挑全行呢單嘢，肯定係屬於後者。話說「一個人」上個禮拜畫咗幅「大作」，講到有條友畫功水皮但專注內容，開拓到一片「藍海」而成為漫畫家，另一條友死鋤畫功最後突圍唔到。結果，呢幅「大作」辣㷫全行咁滯，大家都覺得佢踩低人哋嚟抬高自己，唔少職業漫畫家都畫火柴人恥笑返佢，包括黐開「熱狗」嘅「咳神」盧熾剛，而「熱狗」過氣「首領」狗達（黃洋達）亦都抽水，有網民就覺得「熱狗」係借頭借路攻擊支持開「本民青」嘅「一個人」。本來「一個人」都刪post（帖文）諗住算數，不過佢啲粉絲周圍辣火頭，寸人玻璃心，佢本人亦都自稱「小網民」諗住卸責，咁咪收唔到科囉。 ■香港文匯報記者 陳庭佳
真名何卓賢嘅「一個人」，上個禮拜發表叫做《一個關於藍海的故事》嘅「大作」，唔少人不滿「一個人」自我吹噓，仲要貶低同行，紛紛反擊。
其中三國漫畫《火鳳燎原》個facebook專頁，就好落力咁抽乾「一個人」個「藍海」，先摷返作者陳某早年畫嘅火柴人漫畫，話如果《火鳳》用呢種畫風出書，「故事一早已經畫到三國歸晉了，但我不擔保會不會有人看」；再分享埋行家林競開畫嘅「火柴燎原」，搞到啲花生友笑到有腹肌。
就連台灣嘅行家都頂「一個人」唔順，當地插畫家「安東尼」贈佢兩幅嘢揶揄佢畫功：「為什麼要畫這個嗎？呀，你知道的，對吧？『某個人』。」
表面認衰仔 粉絲盲撐讚好
幅「大作」搞到犯眾憎，「一個人」仲唔知驚咩，於是佢就喺第二日刪post，話幅嘢「內容不恰當」，自己都反省緊，之後更加跪低講「對唔住」，希望網民大人有大量。
不過個專頁有成7萬幾個like（讚好）嘅吽A竟然形容自己只係「一介小網民」，令到啲真網民更加扯火。
而佢啲粉絲亦唔生性，周圍寸人，好似「Dai Mic La」就話：「邊Q個咳神呀？唔Q識佢喎！佢做到唔用畫功唔用內容創作都有7萬fans（支持者）嘅成就先算啦！玻璃心！」
身為職業漫畫家咳神，俾啲嘍囉咁講法，再見到「一個人」竟然讚好盲撐自己嘅留言，即時扯火話：「??家連我朋友都被佢啲支持者侮辱埋，句句什麼玻璃心什麼垃圾，我朋友係我認識之中對畫畫最有上進心同熱誠嘅人，冇必要俾你咁樣公開辱罵，係呀，睇你嘅回應同like comment（讚好留言）我係入埋你『一個人』數。」
狗達亦都開咪講呢單嘢，先笑「一個人」啲畫功，覺得單嘢係佢失言，「佢都唔係畫畫，只係講嘢再加啲火柴人」，話佢幅嘢埋藏否定努力同追求細緻嘅意思，而《熱血時報》上個星期亦都有節目專講呢單嘢。
「黑人」批「熱狗」趁機抽水
「熱狗」咁多動作，有人就覺得佢哋係特登搞支持開對家「本民青」嘅「一個人」。好似被「熱狗」視為叛徒嘅「黑人」「Takki Ma」就話：「『熱狗』無晒政治能量，打唔到毓民，搞『一個人』就有勝算。件事係咳神純天然誘發，『熱狗』只係利用已發生的人抽水。」
黐開「熱狗」嘅網上遊魂「藍鳳凰」，噚日就出post護主：「枉黑人仲話自己係行內人，猛烈批評『一個人』嘅係行內嘅插圖師，聽聞台灣插圖師都有加入，呢啲人幾時係『熱血』啲人？雖然素聞黑人出名冇料扮四條，之前又暴露自己畫功奇差，同『一個人』係同一類人，不過唔係弱到連行內大事件都要扭曲事實咁肉酸呀？」
至於「一個人」，直到前日都仲耍緊冧：「我無意中得罪了各位努力創作的人，是我錯了。我不是要否定努力練習畫功的人，《一個關於藍海的故事》令大家有這個感覺，是我不對，再次向大家說聲對不起。」
唉，早知今日，何必當初呢！抽少啲水好過啦！