■林子健稱被改控「向警務人員虛報有人犯罪」。林子健fb截圖民主黨創黨成員「釘書健」（林子健）早前涉嫌報假案，聲稱自己被內地人員擄走禁錮釘大髀，案件下月7日將會再訊。唔知係咪因為冇人理佢，連黨友都潛晒水，釘書健前日起喺facebook連出幾個post，狂刷存在感，詛咒「誣衊」佢嘅人「一定受天譴」嘅同時，又呻窮話律師費好貴，自己「根本負擔不來」，仲話「若搞不到Duty Lawyer（當值律師），只好選擇自辯或者自×。」暗示緊咩？都好明顯啦！不過，當日陪佢開記者會講奇案嘅黨友入面，何俊仁係執業律師、李柱銘係資深大狀噃，唔少網民都質疑點解釘書健咁都仲要撲水請律師，懷疑根本連佢班黨友都唔信佢，又或者將佢當做棄卒，想劃清界線。 ■香港文匯報記者 甘瑜
釘書健前日喺facebook到更新自己案件情況，話警方修訂控罪，由「誤導警務人員」，改為「向警務人員虛報有人犯罪」。佢聲稱自己「無辜」，堅持事件係「跨境執法」，自己「確實被釘、被打」喎。佢仲話︰「屈枉正直，誣衊受害者，你班賤人，一定受天譴！」
高調呻窮無錢打官司
過咗一個鐘左右，佢又出多個post，由無辜講到冇錢，聲稱「法律是屬於有權、有勢、有錢人的玩意」，仲話自己「若搞不到Duty Lawyer（當值律師），只好選擇自辯或者自×。屆時不要問我為甚（什）麼！」似乎冇人肯為佢嘅律師費孭飛。
釘書健係有罪定無辜，好多網民都已經有自己睇法，但有唔少人都突破盲腸，質疑民主黨有唔少律師、大狀，當日開記者會又浩浩蕩蕩，點解今日竟然冇人肯幫釘書健呢？「Alvin Chan」就問︰「李柱銘唔幫佢打官司咩？」「植滿賢」揶揄回應︰「自己友，畀個九五折囉。」「Thomas So」亦質疑︰「佢班民主黨戰友去晒邊？如果你係無辜點解無人幫你？」
唔知係咪終於有人同佢傾過，釘書健噚日再出post明顯平和咗好多，話自己個大狀「非常好，基本上是仗義幫忙」，又話自己所指嘅係有兩三間律師行好貴喎，然後又畀多句說話人聽︰「不明白為何一方面說是義務，但轉個頭來又收費。」
反對派反轉豬肚係屎
有唔少網民就認為，事件再一次證明反對派反轉豬肚就係屎。「Yuen Tak Ting」就話︰「漢奸李呢次連私生子都唔幫，當日挺弱智健嘅垃圾議員全部龜縮，証（證）明『飯（泛）民』只係顧住自己碗飯，不理他人死活嘅最佳例證。」「Nelson Pang」亦話︰「最佳例子，棄卒，與本黨無關......」
仲有啲網民就研究緊釘書健講嘅嘢。「馮仁鐘」就問︰「如果法官判他有罪......法官會不會受天遣（譴）？」
有好多網民都估緊「自×」即係咩？有人估「自殺」、有人估「自宮」，最好笑就係「袁保安」嘅講法︰「自釘囉......」