■鄭松泰貼出市民貼大字報的片段。 鄭松泰fb截圖市民向立法會議員求助不果，貼張大字報表達不滿會有咩下場？就係會俾「熱血公民」嘅蟲泰（鄭松泰）地辦手足報警處理，再貼埋上網搵網民公審囉。話說前日蟲泰貼咗段片，片中有個激動市民，話自己3次向蟲泰求助都冇人理，激動起嚟喺蟲泰地區辦事處出面貼大字報，最終就落得咁嘅下場嘞。一班「熱狗」紛紛留言話嗰個市民係做戲、扮嘢甚至黐線。針對「熱狗」嘅facebook專頁「香港癲佬力量」就揶揄，蟲泰呢種一言不合就公審嘅行為，喺立法會議員入面都算罕見。
上門表意見 竟被指搞事
蟲泰前日喺facebook貼文貼短片，話上周四有個「口罩男子」喺坅C衣長亨辦事處出面「叫罵」、「在地辦外牆上貼上大字報」，仲話嗰個人貼大字報之前打過電話，「當事人明顯形跡可疑，似是受人指使行事。」佢仲話：「地辦手足已向當區警方備案，今發佈片段呼籲涉事人，『做人最緊要正直』。」
睇返段片，個市民情緒激動，話自己前後3次向蟲泰求助，兩次打電話、一次親身到地辦，但蟲泰方面都「推三推四」，唔肯理佢。佢話自己當日選蟲泰，係因為蟲泰係前立法會議員黃毓民嘅「徒弟」，又批評佢話會盡心盡力幫市民，但結果有難就唔幫，自己真係「有冤無路說」。
蟲泰貼段片出嚟，係咪真係呼籲到嗰個市民就唔知，但肯定就呼籲到自己班「熱狗」去「圍毆」個市民囉。「Vin Wong」就話︰「戲子乎？就為兩餐出賣尊嚴？」「林志雄」亦謂︰「正煩膠，講嘢上氣唔接下氣，叫佢睇心肺科醫生先啦。」「Jani Cheung」就留言︰「助（做）咩呀？語無倫次聽唔明喎，佢食咗藥未呀？」
網民譏開地辦都「揀客」
咁樣都要被公審，「本民青政狗」fb專頁「香港癲佬力量」當然要出文大大恥笑一番啦︰「好歹都係市民嘅意見表達，而佢又只係貼吓紙叫囂吓；你做得立法會議員，何不大方一點，由佢貼完離開，你咪撕返走啲紙囉。難道每逄（逢）有市民表達不滿『熱血公民』，你又來網絡審判，又來清算嗎？」仲話，建制派都唔會咁做，「唯獨鄭松泰呢條中二病，賤格到會公開片段，企圖向異見人士搞網絡審判。」
有唔少網民認同「癲佬」睇法，「Sam Poon」就質疑班「熱狗」話︰「人地（哋）表達意見都要報警？」「黄綺霞」亦話︰「以前『熱狗』都有搞人哋啲地辦喎，今天『熱狗』變成篤灰力量。」「Sharon Ho」直接話︰「咁小器做咩議員！」有網民亦話，「打開門口做地辦，即使對方係咩人都要處理㗎啦，但可能蟲泰真係唔係咁諗，畢竟佢覺得公眾係白痴啊嘛。」■香港文匯報記者 甘瑜
